اسلام آباد۔ 25 جنوری (اے پی پی) وزیراعظم نا خصوصی کمکار موسمیاتی بدلی ملک امین اسلم پارینے کہ پاکستان و سعودی عرب نا نیام اٹ آزموندہ غاتا ہل وتس و گرین سعودی انیشی ایٹو آ باضابطہ وڑاٹ کمک نا بناءِ کننگ کن سعودی ڈل انا ساڑی آ دورہ پاکستان آن وزیراعظم عمران خان نا کنڈآن درستی راستی کرفوک’گرین ڈپلومیس‘ نا پوسکن آ دور بناکیک۔ سےشنبے نادے آ داڑے سعودی عرب نا ڈل انا سروک چیف ایگزیکٹو آفیسر، نیشنل سینٹر فارویجیٹیشن کووراینڈ کمیٹنگ ڈیزرٹیفکیشن ، ڈاکٹر خالد بن عبداللہ العبد القادر تون اوار میڈیا حوال آن تران کرسا امین اسلم سعودی ڈل انا خیرمقدم ءِ کرے۔ اوپارے کہ پاک سعودی کمکار ی ہڑتوم آ برادر ملک آتا نیام اٹ خوشگوار تعلقداری تا پوسکن آ باب بناکیک۔ دا ہمو پوسکن آ پاکستان ءِ ہرانا وزیراعظم تصور ءِ کریسس ہرا کوویڈ۔ 19 نا دین اٹی 5.37 درسد جی ڈی پی گروتھ تون مون آ بسنے۔ اکانومسٹ پاکستان ءِ دینی مرض اٹی ودوک آ زرگزران تون سرفہرست مسہ ملک آتیٹی شمار کرینے۔ اوپارے کہ ملک انا دہ بلین ٹری سونامی شجرکاری ڈٹ انا رداٹ فطرت نا رکھ و چاگڑدی نظام نا بحالی نا سرسہب کوشست آتا اعتراف اٹی اقوام متحدہ نا ادارہ چاگڑد پاکستان ءِ ایشیاپیسیفک فاریسٹری چیمپیئن جوڑ کرینے۔امین اسلم پارے کہ پاکستان ءِ جنگل آتا شونداری نا اسہ ماڈل اس گوندنگانے ہرا ایشیاٹی فالوکننگک۔ اوپارے کہ سعودی ڈل پاکستان نا جنگل آتا آزموندہ غان ہیل کننگ کن بسنے، او ننا قومی پارک، مینگرووز، و مچ آ ملک اٹی دہ بلین شجرکاری نا ہندآتا دورہ ءِ کیک۔ داوخت آ اوسعودی ڈل انا سروک ءِ پیشکش کرے کہ پاکستان بھلو کچ اسے آ سعودی گرین انیشی ایٹیو اٹ اوار مننگ کن جنگل آتا شونداری ٹی تینا آزموندہ ءِ پیش کننگ خواہک دُن کہ ہڑتوم آ ملک آتا نیام اٹ دا کمکاری ءِ سوگو گرین سرکڑدہ و وژن نا مخ تفی دوئی ءِ۔
