اسلام آباد۔ 25 جنوری (اے پی پی) چیئرمین سینیٹ صادق سنجرانی وقفہ سوج آتیٹی وزارت واپار نا سیکرٹری و آفیسر آتا ساڑی مفننگ نا سخت نوٹس ءِ ہلک۔ سے شنبے نادے آ بڑزکو ایوان نا دیوان اٹی وقفہ سوج آتیٹی چیئرمین سینیٹ سوج کرے کہ انت سیکرٹری واپار یا وزارت واپار نا آفیسر اس گیلری ٹی ساڑی ارے ہراڑآ وزیر مملکت پارلیمانی امور علی محمد خان پارے کہ کوویڈ نا پابندی تا سوب آن آفیسر آک گیلری ٹی بننگ کتوس، چیئرمین سینیٹ پارے کہ وزارت واپار نا آفیسر آک داڑے بایدے ساڑی مریر ، اگہ او بتور تو ای وزیراعظم ءِ چٹھی اس نوشتہ کیوہ کہ سیکرٹری واپار ءِ معطل کننگے۔ چیئرمین سینیٹ وقفہ سوج آتیٹی وار وار سیکرٹری واپار نا بننگ نا بارواٹ اَریفے۔ اوپارے کہ کم از کم گریڈ 20 یا اوکان بڑز انا آفیسر آک داڑے بایدے مریر ، دا باندات ءِ استحقاق کمیٹی آ گدریفیوہ، سیکرٹری واپار ءِ ایوان ءِ سنجیدہ ہلوئی تمک ، داوڑ کاریم چلینگپک۔
