اسلام آباد۔ 25 جنوری (اے پی پی) بنجائی وزیر مواصلات مراد سعید پارینے کہ کوئٹہ۔کراچی۔چمن شاہراہ ءِ دورویہ کننگ نا مسہ عشرہ غاتیان قول کرسا کننگا، وزیراعظم عمران خان داسہ الس نادا متکن آ تغ ءِ پورو کننگ والا ءِ، بروک آ تُو داشاہراہ نا تفنگ نا بنداو ءِ تخنگک۔ سے شنبے نادے آ بڑزکو ایوان نا دیوان اٹی سینیٹر دنیش کمار چکاری نوٹس نا ورندی ٹی اوپارے کہ داشاہراہ نا مرغنی 796 کلومیٹر ءِ، دادے دورویہ کننگ بھاز المی ءِ انتئے کہ داڑآ شکست آک معمول جوڑ مسنو، مستین اٹ حکومت آک دا شاہراہ نا تفنگ نا قول کرسا کریر ولے عملی کاریم کتور، داسہ ساڑی حکومت داڑآ کاریم ءِ ترند کننگ ءِ و دا 330 کلومیٹر نا اولیکو سیشن نا ٹینڈر و کنٹریکٹ مسنے، وزیراعظم بروک آ تُو دانا بنداو ءِ تخک وخت اس کہ ایلو اِر اسیکشن ہم فزیبلٹی و ڈیزین نا ریسہ غاتیٹی ءُ۔ اوپارے کہ بلوچستان اٹی 3800 کلومیٹر سڑک ساڑی حکومت نا دور اٹی تفنگ انگ ءِ ، ویسٹرن روٹ سی پیک نا بشخ مننگ اسہ تغ اس ئس، ساڑی حکومت محروم علاقہ غاتے سی پیک اٹ اوار کرینے، سویلی بلوچستان، سویلی خیبرپختونخوا ، انضمام مروک ضلع و ایلو محروم علاقہ غاتا شونداری کن کثیر فنڈ اس فراوان کننگانے، ژوب، خضدار، بسیمہ ، نوکنڈی، ماشکیل، کوئٹہ بائی پاس و ڈیرہ مراد جمالی بائی پاس کون آ بھلو ڈٹ آک پوروی نا ریسہ غاتیٹی ءُ، مسلم لیگ (ن) تینا تدوک آ پنچ سالہ دور اٹی مچ آ ملک اٹی 2000 کلومیٹر سڑک آتا تفنگ نا ڈٹ بندی کرے وخت اس کہ ساڑی حکومت بیرہ بلوچستان اٹی 3800 کلومیٹر مرغن سڑک تفنگ ءِ وخت اس کہ مچ آ ملک اٹی 7889 کلومیٹر سڑک آتا ڈٹ بندی کننگانے، ننا اولیکو مسہ سال اٹی اِرا ہزار 32 کلومیٹر سٹرک تفنگا وخت اس کہ مسلم لیگ (ن) نا دا دور اٹی 732 کلومیٹر سڑک آتا ڈٹ بندی ءِ کننگاسس۔ اوپارے کہ کوئٹہ۔ کراچی۔ چمن شاہراہ ءِ خونی شاہراہ اس پاننگک داسہ دا دورویہ مننگ آن پد خونی شاہراہ اس سلپک و الس ءِ سفر نا گچین آسراتی دُوبریک۔
