اسلام آباد۔ 24 جنوری (اے پی پی) چیئرمین سینیٹ محمد صادق سنجرانی پارینے کہ زرگزران نا پہیہ ءِ گچین وڑاٹ چلیفنگ کن صنعتی بشخ ءِ تینا کڑد ءِ پبی وڑاٹ ادا کروئی مریک تانکہ دامشکل حالیت آتیان پیش تمنگ مرے و لس بندغ ءِ ریلیف ملنگ کے۔ داخیال آتا درشانی ءِ او فارماسیوٹیکل مینو فیکچرنگ ایسوسی ایشن (پی پی ایم اے) نا نمائندہ غاتا ڈل اتون گپ وتران کرسا کرے ہرا دوشنبے نادے آ داڑے اوڑتون اوڑدہی کریر۔ اوڑدہی ٹی سینیٹ نا قائمہ کمیٹی خزانہ نا چیئرمین سینیٹر محمد طلحہ محمود و سینیٹ نا قائمہ کمیٹی واپار نا چیئرمین سینیٹر ذیشان خانزادہ ئسک ہم ساڑی ئسر۔ چیئرمین سینیٹ پارے کہ ہراتم اسکان ملک انا زرگزران تینانت تیا سلپک ہمووخت اسکان جہانی مالیاتی ادارہ غاتیا سیبو و اوفتا شڑت ءِ منگ کن بیوس مرسا کینہ، زرگزران نا پہیہ ءِ گچین وڑاٹ چلیفنگ کن صنعتی بشخ ءِ تینا کڑد ءِ پبی وڑاٹ ادا کروئی مریک تانکہ دامشکل حالیت آتیان پیش تمنگ مرے و لس بندغ ءِ ریلیف فراوان کننگ مرے۔ اوپارے کہ دوائی جوڑ کننگ نا صنعت نا ملک انا زرگزران اٹ اہم ءُ کڑد اسے ، ہندی صنعت نا سوب آن لس بندغ ءِ کبین آ دوائی تا ہلنگ آن بچفنگ اٹ کمک رسینگک۔ اوپارے کہ کنوئی آ گڑا و دوائی تتون اوار نہاد آتیٹی ودکی جہانی کہول آ ہم مون آ بسنے، حکومت نا دا کوشست ءِ کہ ہندی صنعت ءِ سیبو تننگے و زرگزرانی شونداری نا عمل ءِ ترند تر کننگے۔ پی پی ایم اے ساڑی آ منی بجٹ آن پد ودی مروک آ حالیت و خاص وڑاٹ فارماسیوٹیکل بشخ آ تموک آ اثرآتیان معلومدار کرے۔ پی پی ایم اے نا ڈل پارے کہ سیلز خراج نا نافذ کننگ آن دوائی تا نہاد آتیٹی ودکی مریک ہراڑآ سنجیدگی اٹ نظرثانی کننگ نا گرج ءِ۔ ڈل چیئرمین سینیٹ ءِ غٹ مشکل آتیان معلومدارکرے۔ چیئرمین سینیٹ پارے کہ سینیٹ نا قائمہ کمیٹی خزانہ و سینیٹ نا قائمہ کمیٹی واپار گچین وڑاٹ دا غٹ باندات آتے ہُننگ ءُ۔ چیئرمین سینیٹ پی پی ایم اے آن نوشتہی وڑاٹ سلاہ بٹنگا۔ چیئرمین سینیٹ پارے کہ سلاہ تے مون آ تخسا وزارت خزانہ، واپار و ایلو اسٹیک ہولڈر آتون سلابت نا چرجوئی نا بناءِ کننگک تانکہ دوائی جوڑ کننگ نا صنعت نا مشکل آتے جوان وڑاٹ ایسر کننگ کن کوشست کننگ مرے۔ سینیٹر ذیشان خانزادہ و سینیٹر طلحہ محمود ئسک تعلقدار کمیٹی تیٹی ہم دا ویل آتیا سجفنگ کن باوری کرفے۔ اوپارے کہ پالیسی تون تعلقدار ویل آتیا سرجم شرہ کرفنگک، پبی سلاہ مرتب کننگ کن غٹ اسٹیک ہولڈر آتے پبی موقع تننگک۔ ڈل انا باسک آک چیئرمین سینیٹ و ایلو سینیٹرآتا منت واری ءِ ہرفیر۔
