اسلام آباد۔ 24 جنوری (اے پی پی) ملک اٹی مواصلات نا بشخ اٹی براہ راست درملکی زرکاری ٹی اولیکو ششماہی ٹی نمان ودکی ریکارڈ کننگانے۔ اسٹیٹ بینک و زرکاری بورڈ انا کنڈآن دا بابت جاری کروک حساب وکتاب نا رداٹ برجامالی سال انا اولیکو ششماہی ٹی مواصلات نا بشخ اٹی 146.5 ملین ڈالر نا براہ راست درملکی زرکاری ریکارڈ کننگا ہرا تدوک آ مالی سال انا ہند امد انا مقابلہ ٹی زیات ءُ، تدوک آ مالی سال انا ہند امد اٹی ملک اٹی مواصلات نا بشخ اٹی براہ راست درملکی زرکاری نا کچ منفی 41.5 ملین ڈالر ریکارڈ کننگاسس۔ دسمبر 2021اٹی ملک اٹی براہ راست درملکی زرکاری نا کچ 31.9 ملین ڈالر ریکارڈ کننگا۔ حساب وکتاب نا رداٹ اولیکو ششماہی ٹی ملک اٹی ٹیلی کمیونیکیشن نا بشخ اٹی 56.9 ملین ڈالر نا براہ راست درملکی زرکاری ریکارڈ کننگا وخت اس کہ دسمبر 2021اٹی 20.5 ملین ڈالر ئسک۔ اولیکو ششماہی ٹی ملک اٹی انفارمیشن ٹیکنالوجی نا بشخ اٹی براہ راست درملکی زرکاری نا کچ 89.7 ملین ڈالر ریکارڈ کننگا ہرا تدوک آ مالی سال انا ہندا مد اٹی 26.1 ملین ڈالر و دسمبر 2021اٹی 11.3 ملین ڈالر ئسک۔
