اسلام آباد۔ 05 جنوری (اے پی پی) وزیراعظم عمران خان ہمہ جہت شونداری کن مریس مد ڈٹ بندی نا اہمیت ءِ تالان کرسا پارینے کہ ننا پورو کوشست ءِ کہ شونداری نا ہندن ءُ نظام اس مون آ اتین ہراٹی اسہ تپہ و علاقہ اس ہم محروم و پدی سلپ، مچ آ ملک ءِ اسہ وڑ اٹ مون آ ہِننگ نا موقع اس تننگے، جان جوڑی کارڈ انا بناو مواصلاتی رابطہ غاتا مون آ دننگ بھاز بھلو بدلی اسے، مستین اٹ شاہراہ تے پیسہ جوڑ کننگ کن تفنگاکہ، 2013نا مقابلہ ٹی 2021اٹی ہراسڑک آک جوڑ مسر اوفتا خڑچ کم ءِ، سڑک آتا تفنگ اٹ اسہ ہزار ارب روپئی نا کرپشن کننگا، اسہ وامدار ملک اسے ٹی داخہ بھلو کرپشن اس مسکہ ، ریاست مدینہ نا وڑآ ملک ءِ جوڑ کننگ اُن۔ داخیال آتا درشانی ءِ او چارشنبے نادے آ ہکلہ۔ ڈی آئی خان موٹروے نا بنائی دود آن تران کرسا کرے۔ وزیراعظم عمران خان پارے کہ ای مواصلات نا وزارت ءِ خراج تحسین پیش کیوہ۔ بنجائی وزیر مواصلات و اونا وزارت، خاص وڑاٹ نیشنل ہائی وے اتھارٹی گچین کارکڑد نشان تس۔ اینو نن ہکلہ۔ ڈی آئی خان موٹروے نا بناءِ کرین، داشاہراہ غان ملک ءِ بھاز فائدہ مریک۔ مستین اٹ شونداری بیرہ بھلا شار و لاہور اسکان محدود ئسک۔ دے ٹکی راہداری آ چکار کننگا، ہمو کنڈآ زیات شونداری مس۔ ایلو علاقہ غاتے گوجالنگا۔ ملک مریس مد ڈٹ بندی اٹ جوڑ مریک۔ چین بروک آ 30 سال انا حکمت عملی اس ہم مون آ ایسونےو آخبت نا روڈ میپ اس جوڑ کرینے۔ شونداری کن دا المی ءِ کہ مچ آ ملک ءِ اسہ وڑاٹ مون آ ہِننگ نا وارخواہی فراوان کننگے۔ اگہ مریس مد ڈٹ بندی کننگپ تو گڑاس علاقہ تو شونداری نا رُمب اٹی مون آ پیش تمرہ ولے ایلو ملک پدی سلک۔ داڑآن دا مریک کہ زرس مخلوق بھاز ہزگار مریک و گیشتر غریب سلرہ۔ وزیراعظم پارے کہ بدبختی اٹ غٹ پدتموک دنیا نا ہندا ویل ءِ کہ گڑاس مخلوق بھاز ہزگار و ایلوفک غریب سلرہ۔ اسہ اِراعلاقہ غاتیا زیات زرکاری کننگک وخت اس کہ ایلو علاقہ غاک پدی سلرہ۔ اسہ ملک اس ہم داوڑ شون ہلنگ کپک۔ اوپارے کہ 60 انا دہائی ٹی پاکستان نا پلاننگ کمیشن زبردست ڈٹ بندی کرے، اومریس مد حکمت عملی اس اختیار کرے۔ 60 انا دہائی ٹی پاکستان نا شونداری کن بھلو بھلو ڈٹ جوڑ مس۔ اوکان پد اسُل داوڑنا مریس مد حکمت عملی اختیار کننگتو۔ ہکلہ۔ ڈی آئی خان موٹروے آن دا علاقہ غاتے مون آ ہِننگ اٹ کمک رسینگک ہرا شونداری نا رُمب اٹی پدی سلیسنو۔ داعلاقہ غاتا مخلوق پسماندہ ہنداخاطرآن مسر انتئے کہ اوفتیا چکار کننگتو و شونداری نا رُمب اٹی اوار کننگتو۔ پسماندہ علاقہ غاتیٹی ہراسٹ نا زند انا آب گچین مریک اوبھلا شارتیا ہنسا رہینگ انگ نا بناءِ کریکہ و تینا چنا و خاہوت ءِ ہم بھلا شارتیٹی گدریفک انتئے کہ ہموڑے تعلیم، جان جوڑی و ایلو آسراتی تا فراوانی گچین مریک ہرانا سوب آن پسماندہ علاقہ غاک پین شیف ہنار۔ ہراتم چنکار شار تیان ٹیلنٹ بھلا شار تیا کاہک تو او شونداری نا رُمب اٹی پین پدی سلرہ۔ سی پیک نا دیکی راہداری نا اولیکو ریسہ نا تفنگ پورو مننگ آن بروک آ سال تیٹی دا علاقہ غا زبردست اثرمرتب مریک۔ وزیراعظم پارے کہ ہکلہ۔ ڈی آئی خان موٹروے نا تفنگ آن مسافت نا وخت کم مریک و ڈی آئی خان نا 7 گھنٹہ نا سفر3 گھنٹہ سلک۔ علاقہ ٹی شونداری و آسراتی تا فراوانی مریک۔ وزیراعظم پارے کہ حکومت جان جوڑی کارڈ انا اجرا ءِ کرینے ۔ مہالو میانوالی، ڈیرہ اسماعیل خان کون آ مرمر انگا علاقہ غاتا مخلوق ءِ درمان کن بھلا شار تیا ہنوئی تماکہ و چندی بیچارہ مریض کسر اٹ دم تسرہ ۔ پنجاب نا ہرخاہوت ءِ مارچ اسکان ہیلتھ کارڈ ملک ہراڑآن اوفتے 10 لکھ روپئی اسکان نا ہیلتھ انشورنس دوئی مریک۔ داسہ میانوالی، ڈی آئی خان کون آ پسماندہ علاقہ غاتیٹی ہم پرائیویٹ ہسپتال جوڑ مریک۔ انتئے کہ مخلوق تون ہراتم تینا درمان ءِ کرفنگ کن تو ہرجاگہ غا پرائیویٹ ہسپتال ہم جوڑ مریک۔ مہالو پرائیویٹ ہسپتال بھلا شارتیٹی جوڑ مسکہ۔ حکومت تون داخہ پیسہ اف کہ ہرجاگہ غا ہسپتال جوڑ کے، ہیلتھ کارڈ انا سوب آن نجی بشخ ہسپتال تفک۔ ہیلتھ کارڈ بیرہ اسہ کارڈ اس اف بلکن جان جوڑی نا اسہ پورو ءُ نظام اسے۔ وزیراعظم پارے کہ چندی ضلع غاتا سرکاری ہسپتال آتیٹی جان جوڑی نا نظام سہی اف۔ ڈاکٹر آک مرمرانگا علاقہ غاتیا ہنپسہ۔ ہراڑآن مخلوق درمان نا آسراتی آن محروم ءِ۔ ریاست نا بنداوی زمواری تیٹی الس نا جان جوڑی نا خیال ءِ تخنگ بھاز المی ءِ۔ ہنداوڑ تعلیم و انصاف ہم ریاست نا بنداوی زمواری و الس نا بھاز بھلو گرج اسے۔ وزیراعظم پارے کہ جان جوڑی کارڈ و کنکٹیوٹی بھاز بھلو بدلی اسے۔ وزیراعظم پارے کہ ای بھلو وخت اسے آن پاننگ اُٹ کہ کرپشن پاکستان نا غٹ آن بھلا ویل ءِ۔ این ایچ اے نا درور مون آٹے ہراٹی کرپشن ءِ چٹفنگا۔ ہراتم ادارہ سے آن کرپشن چٹک تو الس ءِ بھاز فائدہ مریک۔ تدوک آ حکومت اخس پیسہ غاتیٹی اسہ سڑک اس جوڑ کرے نن ہموخہ پیسہ غاتیٹی اِرا ہنداخہ سڑک جوڑ کرین۔ حالانکہ 2013نا مقابلہ ٹی داسہ خڑچ بھاز زیات ءِ۔ اوکان پد ہم مستین نا مقابلہ ٹی نن ہرا سڑک آتے جوڑ کننگ اُن اوکم خڑچ اٹ جوڑ مننگ ءُ۔ داڑآن داہیت پیدوار مریک کہ کس اسے نا جیب اٹ بھاز پیسہ ہناکہ۔ مستین اٹ سڑک آک داخاطرآن جوڑ متورہ کہ مرمر انگا علاقہ غاتے فائدہ مرے بلکن پیسہ جوڑ کننگ کن سڑک آتے جوڑ کننگا۔ بلوچستان کون آ مرمرانگا علاقہ غاتے ٹی سڑک جوڑ کننگتو ۔ اونا احساس محرومی روا ءِ۔ داخہ بھلو علاقہ اسے شونداری آن محروم تخنگا و ہراڑے مہالو آن شونداری ساڑی ہمو علاقہ غاتے ہی پین شون تننگا۔ اگہ پیسہ غاتے دُزی کننگتوکہ تو ہندا پیسہ غاتیٹی ہنداخہ پین سڑک جوڑ مسکہ۔ اوپارے کہ این ایچ اے نا ریونیو دوگنا مسنے۔ داداخاطرآن ممکن مس کہ انتئے کہ کرپشن ءِ چٹفنگا۔ این ایچ اے نا ڈغارتیا تجاوزات آتے چٹفنگا و کوزہ غاتے پدی ہلنگا ۔ داتم اسکان 5 ارب روپئی نا ڈغار تے واگزار کرفنگانے۔ این ایچ اے ٹی ہندن ءُ بندغ تولوک ئسر ہرافک اواری اٹ سرکاری ڈغار تیا کوزہ کرفیر۔ وزیراعظم بنجائی وزیر مراد سعید و اونا وزارت ءِ گچین کارکڑد آ شاباش ترسا پارے کہ او کرپشن نا چٹفنگ و تینا کارکڑد ءِ تالان کے و الس ءِ پائے وزیراعظم پارے کہ شونداری مدام غٹ ءِ اوار ملفسا مون آ ہِننگ آن مریک اسہ تپہ اسے ڈویلپ کننگ آن شونداری مفک۔ ننا پورو کوشست ءِ کہ شونداری نا ہندن ءُ نظام اس مون آ اتین ہراٹی اسہ تپہ و علاقہ اس ہم محروم و پدی سلپ۔ اوپارے کہ مدینہ نا ریاست دنیا نا تاریخ نا غٹ آن سرسہب ماڈل ءِ۔ نبی کریم صلی اللہ علیہ وآلہ وسلم دنیا نا تاریخ نا غٹ آن سرسہب ماڈل 10 سال اٹی نافذ کرسا نشان تس۔ مدینہ نا ریاست اسہ ایلیٹ کلاس اسے کن الوکہ بلکن اوٹی لس بندغ ءِ بڑز ہرفنگا۔ مدینہ نا ریاست اٹی زرگزرانی و عدالتی انصاف ئس و میرٹ نا پالیسی ئسک۔ ننا کوشست ءِ کہ بروک آ اِراسال اٹی دیکی راہداری ءِ مون آ دین ہراڑآن وزیرستان و بلوچستان تون اوار غٹ پسماندہ علاقہ غاتا الس ءِ فائدہ مریک و بھلا شارتا کنڈآ ہن و برہم کم مریک۔ داکان مست بنجائی وزیر مواصلات وپوسٹل سروسز مراد سعید وزیراعظم ءِ ہکلہ۔ڈی آئی خان موٹروے نا بارواٹ حوال تس۔ داوخت آ بنجائی وزیر شہریار آفریدی، غلام سرور خان، وزیراعظم نا خصوصی کمکار ڈاکٹر شہباز گل و ایلوفک ہم ساڑی ئسر۔
