اسلام آباد۔ 05 جنوری (اے پی پی) وزیراعظم عمران خان الیکشن کمیشن نا کنڈآن پاکستان تحریک انصاف نا مالی کمکاری ٹی سمندر پارپاکستانی تا عطیہ غاتا جانچ انا خیرمقدم ءِ کرسا پارینے کہ پی ٹی آئی اسٹ انگا سیاسی جماعت ءِ ہرانا فنڈنگ نا باقاعدہ سیاسی بنداو اسے۔ چارشنبے نادے آ ٹویٹر آجاری ٹویٹ آتیٹی وزیراعظم عمران خان پارے کہ او الیکشن کمیشن نا کنڈآن پاکستان تحریک انصاف نا مالی کمکاری ٹی سمندر پار پاکستانی تا عطیہ غاتا جانچ انا خیرمقدم ءِ کیک۔ وزیراعظم پارے کہ ننا اکاؤنٹ آتا اخس زیات جانچ پڑتال مریک قوم انا مون آ ہموخس زیات راستکی مون آ بریک کہ او ہراوڑ پی ٹی آئی اسٹ انگا سیاسی جماعت ءِ ہرانا فنڈنگ نا باقاعدہ سیاسی بنداو اسے۔ وزیراعظم پارے کہ او الیکشن کمیشن نا کنڈآن اِر اایلو بھلا سیاسی جماعت پاکستان پیپلزپارٹی و پاکستان مسلم لیگ ن نا فنڈنگ نا ہنداوڑنا جانچ پڑتال نا چاری ءِ۔ داڑآن قوم باقاعدہ سیاسی فنڈنگ و چہیتے سرمایہ دار و ذاتی فائدہ کن قوم انا قیمت آ احسان نا کمک اٹ بھتہ ہلنگ نا پرخ ءِ چاہنگ کیک۔
