اسلام آباد۔ 20 نومبر (اے پی پی) پاکستان اٹی انڈونیشیا نا سفیر ایڈم ملوارمان پارینے کہ پاکستان و انڈونیشیا نا نیام اٹ آجو واپار نا معاہدہ غان ہڑتوم آ ملک آتا نیام اٹ واپاری و اقتصادی تعلقداری تے مون آ دننگک۔ ‘‘اے پی پی’’ تون خصوصی انٹرویو ٹی اوپارے کہ ہڑتوم آ ملک آتا نیام اٹ اولیتی واپار نا معاہدہ مہالوآن ارے ہرا ہڑتوم آ کنڈآتا واپار اٹ ودکی نا گمان ودی کرینے۔ دامعاہدہ غان ہڑتوم آ ملک آتا نیام اٹ واپار اٹ ودکی مسنے خاص وڑاٹ صںعت و کشت وکشار نا بشخ اٹی ہڑتوم آ کنڈآتا واپار ودانے۔ انڈونیشیا نا سفیر پارے کہ اونا ملک ساڑی آ دے تیٹی اولیتی واپار نا معاہدہ غا نظرثانی ٹی پاکستان نا 20 واپاری گڑاتیکن ٹیرف نا کچ ءِ کم کرینے۔ آسیان ٹریڈ ان گڈز ایگریمنٹ نا رداٹ انڈونیشیا پاکستان تون واپاری و اقتصادی تعلقداری تیٹی مون آ دننگ آ گپ وتران ہم کرینے، ننے اومیت ءِ کہ آسیان ٹریڈ ان گڈز ایگریمنٹ ءِ بروک آ سال اسکان گڈیکو دروشم اس تننگک، دامعاہدہ کن 1993 ء آن کوشست کننگ انگ ءِ۔ دامعاہدہ آسیان پلس ون ایف ٹی اے و علاقائی جامع اقتصادی شریداری (آرسی ای پی ) نا است خواہی تا آدینک ءِ۔ انڈونیشیا نا سفیر پارے کہ آسیان اسہ سوگو ءُ واپاری بلاک اسے، آخبت اٹ دا بلاک اقوام عالم تون واپاری و اقتصادی تعلقداری جوڑ کیک۔ اوپارے کہ داہیت ستاکڑزک کہ پاکستان و آسیان ملک آتا نیام اٹ واپاری و اقتصادی تعلقداری جوڑ ءِ، پاکستان و آسیان ملک آتا اسیجائی منڈی 87 کروڑ نفوس آتیا تالان ءِ تانکہ اوفتا نیام اٹ ہڑتوم آ کنڈآتا واپاری کچ بیرہ 7.5 ارب ڈالر ءِ۔
