حضرو۔ 20 نومبر (اے پی پی) وزیراعظم پاکستان نا خصوصی کمکار موسمیاتی بدلی ملک امین اسلم پارینے کہ بیرہ عمران خان ملک ءِ ویل آتا مین آن کشنگ کیک، مچ آ جہانی برادری عمران خان ءِ قدر انا نظراٹ ہرک۔ اوداخیال آتا درشانی ءِ یونین کونسل تاجک نا خلق اعوان آباد اٹی تفوک آ جنازہ گاہ و سڑک نا بناءِ کننگ نا وخت آ کرے ہرافتیا80 لکھ روپئی خڑچ بسنے۔ داوخت آ اوڑتون اوار پی ٹی آئی نا ہندی سرکڑدہ غاک ہم ساڑی ئسر۔ ملک امین اسلم پارے کہ وزیراعظم عمران خان پیشن نا ملک رہینگوک آ پاکستانی تے وونٹ انا حق ترسا تاریخ اس نوشتہ کرینے۔ مسکوہی حکومت آک دا بارواٹ بیرہ ہیت کرسا کریر وخت اس کہ عمران خان عمل کرسا نشان تس۔ پیشن نا ملک رہینگوک آ پاکستانیک ملکی زرگزران اٹ مخ انا ملی نا حیثیت تخرہ و او ملک اٹی رہینگوک آ پاکستانی تا نسبت پیشن رہینگسا پاکستان کن زیات دڑد تخرہ داوخت آ پیشن نا ملک 90 لکھ پاکستانی ورکرز کاریم کننگ ءُ۔ وزیراعظم عمران خان اوفتے وونٹ انا حق ترفسا جہاد کرینے۔ ملک امین اسلم پارے کہ مسکوہی حکومت آک لٹ وپُل کرسا پیشن نا کبین انگا علاقہ غاتے ٹی فلیٹ جوڑ کریر و الس ءِ نیزگار و مفلوک الحال ہلار وخت اس کہ عمران خان الس نا راجی آسراتی و شونداری کن کاریم کننگ ءِ۔
