اسلام آباد۔ 11 اکتوبر (اے پی پی) وزیراعظم عمران خان پارینے کہ اوغانستان اٹی پابندی تیان انسانی تنکی و ہڑدڑودی مننگ نا گڑتی ءِ، مسہ لکھ اوغان فوج بیدس جنگ آن سلہہ بٹیر، طالبان تےوخت تننگے، اوغانستان نا ہمسایک جامع حکومت نا مخ تف ءُ، اوغانستان غٹ ہمسایہ ملک آتے کن اسہ واپاری ءُ گزرگاہ اسے۔ دوشنبے نا دے آ مڈل ایسٹ آئی ءِ خصوصی انٹرویو ٹی وزیراعظم عمران خان پارے کہ دنیا اوغانستان تون بایدے گپ وتران کے۔ اوفتے پابندی خلسا بیوس کینہ تو او مزاحمت کیرہ۔ اوپارے کہ نن 2008اٹی امریکی سرکڑدہ غاتے پاریسن کہ اوغان ویل انا ہچ ءُ فوجی ایسر اس اف۔ اوغانستان آن امریکی فوج انا پیش تمنگ و طالبان تا پیش گامی آن پد نن ہڑدڑ و روس و برطانیہ نا اوغانستان آن پیش تمنگ آن پد آنبار خانہ جنگی نا گمان کرینہ ولے مسہ لکھ اوغان فوج جنگ آن بیدس سلہہ بٹیر۔ اوغانستان اٹی حکومت بیرہ شاری علاقہ غاتسکان ئس خلقی آ علاقہ غاتے ٹی طالبان تے مقبولیت دوئی ئس۔ امریکہ نا پیش تمنگ آن پد انا حالیت آتیان پک مس کہ دُتکی و کرپٹ حکومت کن کس اس جنگ تفک۔ وزیراعظم پارے کہ پاکستان ڈیہہ ٹی اقتصادی کمکاری ءِ مون آ دننگ خواہک۔ وزیراعظم پارے کہ امریکی صدر تون کنا ہیت متو ولے وزیرخارجہ نا امریکی ہم منصب و ایلو کہول آ نن رابطہ ٹی اُن۔ وزیراعظم پارے کہ بھارت اٹی پورو وڑاٹ نسل پرست حکومت جوڑ ءِ، دنیا بھارت نا غیرکانودی کوزہ گیری ٹی کشمیر اٹی انسانی حق انا بھلا خلاف ورزی تا نوٹس ءِہلے، اقوام متحدہ نا قرارداد آتا رداٹ کشمیری تے استصواب رائے نا حق تننگے۔
