اسلام آباد۔ 11 اکتوبر (اے پی پی) صدر مملکت ڈاکٹر عارف علوی پارینے کہ اوغانستان اٹی امن آن ڈیہہ ٹی شونہالی بریک و داڑآن دنیا کن کاروباری وارخواہی تا کسر ملنگک ہراڑآن نیامی ایشیائی ریاست آتون رابطہ قائم مننگ کیک۔ متحدہ عرب امارات نا دورہ نا وخت آ ’’خلیج ٹائمز‘‘ءِ انٹرویو ٹی اوپارے کہ اوغانستان اٹی بھسکاری نا مطلب پاکستان آ پین مہاجرآتا بھاریم مریک، پاکستان ہمسایہ ملک اٹی نزوری خواپک بلکن است خواہی ءِ کہ ملک اٹی غٹ تعلقدار سیاسی فریق آتا نمائندگی کروک آ اسہ جامع حکومت اس جوڑ مرے۔ صدر مملکت اوغانستان اٹی حکومت نا بدلی ٹی پاکستان نا کڑد انا تاثر ءِ مسترد کرساپارے کہ نن بیرہ انسانی بنداو تیا طالبان تا کمک ءِ کننگ اُن انتئے کہ اوغانستان نا الس پابندی و فنڈآتا بندمننگ نا سوب آن مشکل آتا گواچی ءُ۔ ڈاکٹر عارف علوی پارے کہ اوغانستان اٹی سوگوی پاکستان نا فائدہ ٹی ءِ، امریکہ اوغانستان آن عجلت اٹ پیش تما و داکہ اوغانستان نا ویل انا ہچ ءُ فوجی ایسری اس اف۔ صدر مملکت پارے کہ نن مدام امریکہ ءِ جنگ آن بچنگ کن آمادہ کننگ نا کوشست کرین و گچین ایسر نا وڑاٹ مذاکرات نامخ تفی ءِ کرین۔ اوداہیت آ زورشاغساپارے کہ اگہ امریکی و نیٹو فوج 23 کھرب ڈالر خڑچ کننگ آن پد ہم اوغانستان اٹی سوگوی اتنگ کتو تو ولدا پاکستان کن داوڑ کننگ امر ممکن مریک۔ڈاکٹر عارف علوی پارے کہ پاکستان بھلو وخت اسے آن 40 لکھ اوغان باہوٹ آتا مہمانداری ءِ کننگ ءِ و اوغان الس ءِ اودے اسہ خیرسگالی نا معاملہ اس بایدے تکنگے۔ اوغانستان نا ساڑی آ حالیت آتا ذکر ءِ کرسا اوپارے کہ نن اوغانستان آن سفارتکار و ایلو مخلوق ءِ کشنگ اٹ ہم بھاز فعال و مثبت کڑد ادا کرین و دنیا ننا داکوشست آتے امنا کرے۔ اوپارے کہ مچ آ دنیا ٹی کبینی ودنگ ءِ، پاکستان دنیا نا اسٹ انگا ملک اف ہرادے دا چیلنج تون مون تروئی تمنگ ءِ، کبینی داخاطرآن زیات ءِ انتئے کہ جہانی مارکیٹ اٹی اجناس و تیل انا نہادآک ودنگ ءُ ولے اوکان پد ہم حکومت سپلائی چین میکانزم و گچین نظم و نسق نا کمک اٹ خور انا نہاد آتے کنٹرول کننگ کن گام گیج کیک۔ صدر مملکت اسہ سوج اسے نا ورندی ٹی پارے کہ پاکستان سہی کسرآٹی ءِ واونا آخبت روشناءِ۔ اوپارے کہ حکومت کورونا دین، روزگار نا وارخواہی ودی کننگ و زرگزران نا بحالی کون آ بھلا چیلنج آتامون ءِ توننگ کن وخت آ سہی گام گیج کرے و دین آن پد ہم تدوک آ مالی سال اٹی جم قومی پیدوار نا شرح نمو چار درسد نا خڑک ئس۔ ڈاکٹر عارف علوی دبئی ایکسپوءِ اسہ شاندار ایونٹ اس گوندسا پارے کہ مچ آ دنیاٹی اسہ چیلنجنگ چاگڑداسے آن پد ہم اسہ سرسہب شواسے نا مہمانداری ءِ کننگ نا غٹ تر سہرا بصیرت مند سرکڑدہ ءِ کاہک۔ ایکسپو2020نئے بیرہ متحدہ عرب امارات بلکن مچ آڈیہہ کن اسہ اہم ءُ ایونٹ اسے ہراڈیہہ و اوڑآن پیشن نا ملک آتے ملٹی نیشنل کمپنی تتون رابطہ و شریداری ءِ برجاتخنگ نا اسہ یکتاءُ موقع اس فراوان کرے۔
