اسلام آباد۔ 04 اکتوبر(اے پی پی) صدر پاکستان ڈاکٹر عارف علوی نا کنڈآن میڈیا ءِ بریسٹ کینسر نا بابت آگاہی مہم نا بابت چھٹی اس مون تننگا۔ صدر مملکت میڈیاءِ پارینے کہ او زالبول اٹ سینہ نا کینسر نا بارواٹ آگاہی ودی کننگ کن حکومت و سول سوسائٹی نا کوشست آتون تفے تانکہ پورو معلومداری، زوت تشخیص و وخت آ درمان نا کمک اٹ نہادی انسانی جان تے ہلوک آ مرض انا گواچی مننگ آن بچفنگ مرے۔ صدر مملکت پارے کہ پاکستان اٹ زالبول اٹی کینسر نا 44 درسد کیس سینہ نا کینسر نا ءُ، زوت تشخیص مننگ آن مرض آن نجات دوئی کننگ نا گمان 98 درسد ءِ۔ اوپارے کہ راج اٹ ممنوع سرحال مننگ نا سوب آن زالبول آک مرض انا زوت تشخیص ءِ کرفنگ کپسہ، زوت تشخیص مفننگ نا سوب آن سینہ نا کینسر اٹ اختہ 50 درسد زالبول جان آن دوتے سلرہ۔ صدر مملکت پارے کہ زالبول آتے ہرمسہ تُو اٹی اسہ وار تینا معائنہ ءِ تینٹ کننگ نا است بڈی ءِ کننگے، آگاہی مفننگ و ولدا ڈاکٹر آتون رابطہ کننگ اٹ ہُرے کون آ سوب آک سینہ نا کینسر آن زیات مرک آتا کچ انا سوب آک ءُ، ہُرے آ تشخیص نا سوب آن اسہ لکھ آن 50 ہزار زالبول کزیت کیرہ۔ صدر مملکت پارے کہ بیگم ثمینہ علوی و اونا ٹیم بریسٹ کینسر نا بابت اکتوبر اٹ مخلوق نا آگاہی کن چندی پروگرام تے شین تسنو، داپروگرام تیٹی خود تشخیصی و مرض انا وخت آ تشخیص نا اہمیت ءِ تالان کننگک۔ اوپارے کہ میڈیا تدوک آ سال مخلوق ءِ بریسٹ کینسر نا بارواٹ تعلیم تننگ کن گچین ءُآگاہی مہم اس چلیفے ، میڈیا خبر، ٹالک شو، آرٹیکلز، کالمز وایڈیٹوریل نا کمک اٹ دابارواٹ آگاہی ودی کننگ اٹ تینا کڑد ءِ ادا کے۔ صدر مملکت پارے کہ میڈیا سینہ نا کینسر نا بارواٹ آگاہی ودی کننگ کن حکومت و سول سوسائٹی نا کوشست آتون تفے۔
