وزیرخارجہ مخدوم شاہ محمود قریشی تون ڈنمارک اٹی تعینات پاکستانی سفیر نا اوڑدہی

اسلام آباد۔ 04اکتوبر (اے پی پی) وزیرخارجہ مخدوم شاہ محمود قریشی تون ڈنمارک اٹی تعینات پاکستان نا سفیر احمد فاروق دوشنبے نادے آ وزارت خارجہ ٹی اوڑدہی کرے۔ اوڑدہی ٹی پاکستان و ڈنمارک نا نیام اٹ تعلقداری تا سوگوی و کثیر الجہتی بشخ آتے ٹی ہڑتوم آ کنڈآتا کمکاری نا مون آ دننگ نا بابت گپ وتران کننگا۔ وزیرخارجہ پارے کہ پاکستان، ڈنمارک اتون ہڑتوم آ کنڈآتا تعلقداری تے خاص اہمیت ایتک۔ اوپارے کہ ڈنمارک نا وزیر خارجہ ژپے کوفونا ساڑی آ دورہ پاکستان آن ہڑتوم آ ملک آتا نیام اٹ بڑزکو کہولی رابطہ غاتا مون آ دننگ نا درشانی ءِ، پاکستان، ڈنمارک تون اقتصادی سفارتکاری ءِ کاریم اٹ اتسا، واپار، زراتون اوار تین پہ تینی است خواہی نا بشخ آتے ٹی ہڑتوم آ کنڈآتا کمکاری ءِ ودفنگ نا خواہندار ءِ۔ وزیرخارجہ پاکستان وڈنمارک نا نیام اٹ ہڑتوم آ کنڈآتے پین سوگو کننگ نا بابت پاکستان نا سفیر ایمبیسیڈر احمد فاروق نا خذمت آتا ستاءِ کرے۔ سفیر احمد فاروق وزیرخارجہ نا منت واری ءِ ہرفسا ، پاکستان و ڈنمارک نا نیام اٹ ہڑتوم آ کنڈآتا تعلقداری تا سوگوی کن تینا غٹ تر توانائی تے کاریم اٹ اتنگ نا باور کرفے۔