اسلام آباد۔ 04اکتوبر (اے پی پی) وزیرخارجہ مخدوم شاہ محمود قریشی پارینے کہ موسمیاتی بدلی نا سوب آن پاکستان آبی وسیلہ غاتا دوئی کننگ اٹ کمتی والا ملک آتے ٹی اوار مننگ کیک۔ پاکستان و ارجنٹائن نا نیام اٹ تدوک آ 70 سال اٹی ہڑتوم آ کنڈآتا تعلقداری تے ودفنگ ہرا تین پہ تینی پت، شرف و کمکاری نا درشانی ءُ۔ داہیت آتے او دوشنبے نادے آ پاکستان و ارجنٹائن نا نیام اٹ سفارتی تعلقداری نا 70می سال دے انا وخت آ شجرکاری نا دود آن تران کرساپارے۔ پاکستان و ارجنٹائن نا نیام اٹ سفارتی تعلقداری نا 70 می سال دے انا وخت آ وزیرخارجہ مخدوم شاہ محمود قریشی و ارجنٹائن نا سفیر لیپولڈوفرانسسکوساہورس داڑے ارجنٹینا پارک اٹ اڈ ہلوک آ دود اٹی یات گاری نیال اس خلکر۔ دود اٹی بنجائی وزیر سید فخر امام، وزیر مملکت موسمیاتی بدلی زرتاج گل، و ایلو اہم سیاسی و راجی شخصیت آک ساڑی ئسر۔ دود آن تران کرسا وزیرخارجہ پارے کہ پاکستان و ارجنٹینانا نیام اٹ تدوک آ 70سال اٹی ہڑتوم آ کنڈآتا تعلقداری تے ودفنگ ہراتین پہ تینی شرف، و کمکاری نا درشانیءُ۔ پاکستان و ارجنٹینا نا نیام اٹ ہڑتوم آ کنڈآتا تعلقداری تے پین سوگو کننگ کن ادارہ جاتی میکانزم نا کڑد بھاز اہم ءِ۔ اوپارے کہ ہڑتوم آ ملک آتا نیام اٹ واپار نا مون آ دننگ کن اسیجائی کمیشن اس ساڑی ءِ۔ 20 مئی 2021ء آ اڈہلوک آ ننا آخیریکو میٹنگ اٹی، نن کشت وکشار، دواجوڑ کننگ، انفارمیشن ٹیکنالوجی و صنعتی بشخ آتیا اسیجائی ورکنگ پڑک اس جوڑ کننگ آ امنا کرین تانکہ آخبت اٹ واپاری و زرگزرانی کمکاری ءِ پین مون آ دننگ مرے، مخدوم شاہ محمود قریشی پارے کہ اسہ اسیجائی کاروباری کونسل اس ہم بزنس ٹو بزنس انٹریکشن ءِ ودفنگ کن جوڑ کننگانے۔ ہڑتوم آ ملک آتا نیام اٹ ہڑتوم آ کنڈآتا سیاسی سلابت باقاعدگی اٹ مریک۔ مخدوم شاہ محمود قریشی پارے کہ ننا پارلیمان اٹی پاکستان، ارجنٹائن فرینڈ شپ پڑک آتا ساڑی گری ہڑتوم آ کنڈآتا پارلیمانی تعلقداری تا سوگوی نا نشانی ءِ۔وزیرخارجہ پارے کہ برطانوی وزیراعظم اقوام متحدہ جنرل اسمبلی نا 76 می دیوان نا وخت آ تینا تقریر اٹی وزیراعظم عمران خان نا ’’ٹین بلین سونامی ٹری‘‘ ڈٹ انا ستاءِ کرے۔ موسمیاتی بدلی تا سوب آن خطرہ داہیت انا ءِ کہ پاکستان وسیع آبی وسیلہ غاتا حامل ملک آن، آبی وسیلہ غاتا دوئی کننگ اٹ کمتی والا ملک آتیٹی اوار مننگ کیک، داحالیت آتے ٹی شجرکاری ءِ مون آ دننگ اہم ءُ حکمت عملی اسے۔ شاہ محمود قریشی پارے کہ 4 دسمبر آ نن لاہور اٹی پاکستان و ارجنٹائن نا نیام اٹ ’’پولومیچ‘‘ اس اڈتننگ اُن۔ پاکستان اٹ ارجنٹائن نا سفیر ہم دود آن تران کرے و تدوک آ ہفت دہائی ہڑتوم آ کنڈآتا سفارتی تعلقداری آ است جمی نا درشانی ءِ کرسا اوفتے پین سوگو کننگ نا عزم انا درشانی ءِ کرے۔
