اسلام آباد۔2اکتوبر (اے پی پی): مزن وزیر عمران خان ءَ گوشت کہ پاکستان ءُ اوگانستان ءِ تاریخ ءِ نزیکیں یکوئی است انت، اوگانستنا ءَ اچبر ڈنی طاقت آناں قبول نہ کتگ، پاکستان کشاں چیل گوما گیواری ءِ ھلاپ بوتگ، جست ایش انت کہ امریکہ طالبان آناں کدئی قبول کنت ؟ صدر بائیڈن ءَ را نشانگ بندگ ناانصافی اِت استیں جاور ابید آئی ءِ کرا دگہ اچ راھ ءُ کشک نہ بوتگ، کشاں چیل ءِ گیش بوھگ ءَ چہ درستاں گیش اوگان الس آناں تاوان رسیت، پاکستان ءُ اوگانستان ءِ وت مہ وت نزیکیں یکوئی ءِ است انت۔ اوگانستان ءَ اچبر ڈنی طاقت آناں نہ من اتگ ءُ سیم سر ءِ دوئیں نیمگ ءَ پشتون راج آباد انت، پٹھان آں گوں نیک راھی سیادی نہ انت بلکینگ ءَ راجی تک ءِ جھلانکیں یکوئی ءِ است، امریکی الس اوگانستان ءِ جاور ھال آں گوں بے سما انت، کشاں چیل ءِ اردی گیواری ءِ ھلاپ آں، مزن وزیر ءَ اے ھیالانی درشانی شمبے ءِ روچ ءَ ترک ٹی وی چینل ٹی آر ٹی ءَ را دات5گیں انٹریو ءِ ساھت ءَ کت۔ آئی ءَ گوشت کہ اگاں ما امریکی پالیشی آنی ھلاپ ءَ بکن آں گڈا مارا ایراد ءُ بھتام بندگ بیت۔ مارا ناشرکاری ءِ ھلاپ ءَ جنگ ءَ ٹوھیں مالی ءُ جانی تاوان رستگ، درستانی تاوان ءِ سبب ءَ اوگانستان ءَ امریکہ ءِ ھلاپ ءَ کسد ءُ کینگ آنی تہ ءَ گیشی بوتگ، اوگانستان ءِ خیر خواہ بوھگ ءِ رد ءَ ما لوٹاں کہ آھودا ایمنی ءُ برجائی بہ بیت، توامیں پریک آنی گوما یکجائیں حکومت ءِ بہ بیت، تاریخ گواہ انت کہ اوگان اچ کس ءِ دست ءِ چیر ءَ نہ بوتگ انت۔ درکپگ ءِ وھد ءَ کابل ائیر پورٹ ءِ سر ءَ پیداک بوتگیں جاور ھال آنی سبب ءَ امریکی صدر ءِ سر ءَ ایراد گرگ بوھگ ءَ انت، پاکستان ءِ ارد مھکم ءُ تجروبگ کار انت، گوستگیں 40 روچ ءَ چہ بندش جتگیں ٹی ٹی پی ءِ ارش آنی تہ ءَ گیشی بوتگ بلے ما ایشی ءَ گوں گر ءُ چیل بوھگ ءِ واستہ تیار آں، پاکستان ءَ را امریکی ڈرون ارش آں چہ پیداک بوھوکیں تاوان آناں سگگ کپتگ۔ بندش جتگیں ٹی ٹی پی ءِ لستیں گروپ آں گوں ایمنی ءِ واستہ گپ ءُ تران کنگ لوٹاں، بندش جتگیں ٹی ٹی پی ءَ را نرم کنگ ءِ واستہ سول ءُ تران بوت کنت، سول ءُ تران ءَ چہ اوگان طالبان سلاھ کنوک ءِ کرد ءَ پیلو کت کناں، ما بلوچ سرمچار آں گوں گپ ءُ تران کنگ ءَ آں، کشمیر ءِ جیڈھ ءَ را دگنیا ءِ ھمک فورم ءِ سر ءَ سہرا کنانں، بنی آدمی ھک آنی ھوالگ ءَ میاں اوستمانی برات ھمگونگیں رویہ بکن انت۔ منی ھیال انت کہ آیوکیں روچاں چین ءِ صدر ءَ گوں گند ءُ نند بیت، اپوزیشن ءِ سر ءَ کرپشن ءِ ٹوھیں بھتام است ءُ آ ایوک ءَ وتی رکھینگ ءِ جنگ ءَ مڈگ ءَ انت، پیپلز پارٹی ءُ مسلم لیگ (ن) سیاسی ناں بلکینگ ءَ ھاندانی پارٹی انت۔ مزن وزیر عمران خان ءَ اوگانستان ءِ جاور ھال آنی سر ءَ نہ وشی ءِ درشان ءَ کنان ءَ گوشت کہ گوستگیں وھد ءَ اوگانستان ءَ روس ءِ درکنگ ءِ وھد ءَ لکھانی کساس ءَ اوگان آں وتی جان قربان کتگ انت ءُ اے رند ءَ ھم امریکہ ءِ در کنگ ءَ چہ پد لکھانی اوگان آنی مرگ ءِ امیت بوتگ بلے طالبان آنی جوانیں گامگیج آنی سبب ءَ گر ءُ دار بوتگ۔ آئی ءَ گوشت کہ اوگانستان حکومت ءِ 70 ءَ بگر تاآں 75 درسد بجٹ ڈنی کمک ایگ انت بلے طالبان ءِ حکومت ءَ نندگ ءَ چہ پد گیر ملکی کمک کم بوتگ انت۔ مزن وزیر ءَ میاں اوستمانی برات آناں گوشت کہ طالبان آناں وتی پاد آنی سر ءَ اوشتاریگن ءِ واستہ بنی آدم دوستی ءِ بنیات ءَ کمک ءِ ضلورت انت۔ آئی ءَ گوشت کہ ھمساھگیں ملک آنی شور ءُ مشور ءَ چہ طالبان حکومت ءَ را منگ ءِ پیسلہ کنگ بیت۔ بھارت ءَ بنی آدمی ھک آنی لگت مالی ءِ ھلاپ کنگ ءِ ھوالگ ءَ مزن وزیر عمران خان ءَ گوشت کہ میاں اوستمانی برات بھارت ءَ مسلمان آں ھوار ایندگر گور آنی لگت مالی کنگ ءِ ھوالگ ءَ نوٹس بہ زور ایت۔ آئی ءَ گوشت کہ کشمیر ءِ جیڈھ ءَ را ھمک میاں اوستمانی فورم ءَ سہرا کنگ بیت تانکہ کودکیں کشمیری آناں بھارت ءِ ظلم ءُ لگت مالی ءَ چہ رکھینگ بہ بیت۔ آئی ءَ گوشت کہ بھارت تاں وھد ءِ 5 اگست 2019 ءِ گیر کانودی گامگیج ءَ را واپس نہ زور ایت ءُ کشمیر ءِ جیڈھ ءَ ھوار ایندگر جیڈھ آنی گیواری ءِ واستہ سول ءُ تران ءِ ٹیمبل ءَ واپس نہ ائیت یکوئی گہتر بوت نہ کن اَنت۔ یک جستے ءِ پسو ءَ مزن وزیر عمران خان ءَ گوشت کہ تحریک طالبان پاکستان بازیں گروپ آں گوں سول ءُ تران بوت کنت، اے ھوالگ ءَ اوگان طالبان سلاھ کنوک ءِ کرد ءَ پیلو کت کناں۔ مزن وزیر ءَ گوشت کہ پاکستان ءِ کشاں چیل ءِ اردی گیواری ءِ مدام ھلاپ کتگ ءُ ما سول ءُ تران ءِ وسیلگ ءَ کشاں چیل ء، سیاسی گیواری ءِ سر ءَ دل یکیمی دار آں۔
