اسلام آباد۔ 01اکتوبر(اے پی پی) وزیراعظم عمران خان پارت کرینے کہ بِے و دواجوڑ کننگ نا بشخ آتے ٹی برآمد آتے ٹی گیشتری نا پورو لائخی آن فائدہ ہرفنگ کن غٹ تر المی گام گیج کننگے۔ وزیراعظم آفس نا میڈیا ونگ آن جاری بیان نا رداٹ داپارت ءِ او جمعہ نادے آ نیشنل ایکسپورٹ ڈویلپمنٹ بورڈ انا دیوان نا کماشی ءِ کرسا تس۔ دیوان اٹی وزیرخزانہ شوکت فیاض ترین، وزیر صنعت و پیداوار مخدوم خسروبختیار، سلاہکار واپار و زرکاری عبدالرزاق داؤد ، خصوصی کمکار ڈاکٹر فیصل سلطان، ڈاکٹر شہبازگل ، چیف ایگزیکٹیو آفیسر ڈرگ ریگولیٹری اتھارٹی آف پاکستان (ڈریپ) عاصم رؤف، دواجوڑ کننگ و بِے انا بشخ آتا نمائندہ و تعلقدار بڑزکو آفیسر آک بشخ ہلکر۔وزیراعظم ءِ خاص وڑاٹ بِے و دواجوڑ کننگ نا بشخ آتے ٹی برآمدآتے ٹی گیشتری نا گمان آتیان معلومدار کننگا۔ وزیراعظم ءِ پاننگاکہ پاکستان دا رداٹ خوش قسمت ءِ کہ داڑے ہروڑنا بِے ملک۔ اوفتے ٹی خلی آ بِے، سمندری بِے وکمب آتیان دوئی مروک بِے اوار ءِ۔ 6.2 بلین ٹن نا جم کوڑی تتون کھیوڑہ سالٹ مائن دنیاٹی بِے انا ارٹ میکو بھلا کانڑ ءِ۔ پاکستان تون 1050کلومیٹر مریس کرکی پٹی تون سمندری بِے انا بھلو کوڑی ہم ارے۔ 350 ملین ٹن جہانی بِے انا کھپت نا کم و ود 60 درسد کیمیائی صنعت جوڑ کیک۔ پاکستان نا سالانہ بِے انا پیدوار 4 ملین ٹن ءِ، وخت اس کہ ہرسال بیرہ 3 لکھ ٹن دوئی کننگ انگ ءِ۔ حب سالٹ و بلوچستان نا حکومت بِے انا برآمد اٹی پاکستان نا گیشتر گمان تے کاریم اٹ اتنگ کن اسہ پوسکن ءُ سالٹ ڈٹ اسے نا بناءِ کرینے۔ دا دنیا نا غٹ آن بھلا بِے ودی کننگ نا ڈٹ مریک، و بِے انا برآمد آتے 2023اٹی 400 ملین ڈالر آن ودفک و بروک آ سال تے ٹی 200 ملین ڈالر سالانہ نا کچ اٹ ودکی کرساکیک۔ مستی پاننگاکہ داوخت آپاکستان نا دواجوڑ کننگ نا برآمدآک 275 ملین ڈالر ءُ ہرا پین 74.3بلین ڈالرآن ودنگ نا کچ تخک۔ مشینری و سازوسامان اٹی زرکاری، پاکستانی دوائی تا رجسٹریشن نا عملءِ آوار کننگ، پنی آ ملٹی نیشنل کمپنی (MNCs)تون ڈٹ آتے ٹی شریداری، و برانڈنگ کن جہانی منڈی تیٹی سیلز و مارکیٹنگ ٹیم تا تقرری نا کمک اٹ شونداری نا داکچ آن پبی فائدہ ہرفنگ مریک۔ وزیراعظم تعلقدار کمامدارآتے پارت کرے کہ بِے و دواجوڑ کننگ نا بشخ آتے ٹی برآمد آتے ٹی گیشتری نا پورو لائخی آن فائدہ ہرفنگ کن غٹ تر المی گام گیج کننگے۔ وزیراعظم داہیت انا درشانی ءِ کرے کہ حکومت زرگزران ءِ پین سوگو کننگ و روزگار نا وارخواہی تے ودفنگ کن ملک اٹ کاروبار دوست پالیسی تیا چکار تخنگ ءِ۔ وزیراعظم داہیت آ ہم زور شاغا کہ کاروباری برادری زیات آن زیات ویلیو ایڈیشن نا دوئی کننگ کن پوسکن آ ٹیکنالوجی ءِ کاریم اٹ اتے۔
