اسلام آباد۔ 01 اکتوبر (اے پی پی) وزیرخزانہ شوکت ترین پارینے کہ حکومت اوگرانا سلاہ و سوج آتا برعکس پٹرولیم مصنوعات آتا نہاد آتے ٹی ہرا ودکی نا پڑو ءِ کرینے اوڑآن حکومت ءِ اِرا ارب روپئی نا مالی بھاریم ءِ سگوئی تمک، وزیراعظم نا پارت آ پٹرول بیرہ 4 روپئی و ڈیزل بیرہ 2 روپئی فی لیٹر ودفنگانے حالانکہ اوگرا پٹرول 8 روپئی وڈیزل ءِ سوامسہ روپئی ودفنگ نا سلاہ تسوسس، وزیراعظم نا پرمان آ خولم نا نہاد ءِ کم کرسا 1950 کننگانے ہراڑآن نُت انا 20 کلونا تھیلا 1100 روپئی ٹی ملک، کنوئی آ تیل آ سیلز خراج نا کچ اٹی 44 درسد کمتی نا فیصلہ کننگانے ہراڑآن سی انا نہاد آتے ٹی پیدوار کمتی مریک، حکومت دُوانزدہ ءُ نیم ملین شیفکو تپہ ءِ نُت، بورہ، دال و سی تیٹی براہ راست سبسڈی تننگ نا فیصلہ کرینے، اسہ ہفتہ غان پد مچ آ ملک اٹی بورہ 90 روپئی فی کلو بہامریک، وزیراعظم نا پارت آ مڈل مین نا کڑد ءِ کم کننگ و نہاد آتے کنٹرول اٹ تخنگ کن پرائس مجسٹریٹ نا نظام ءِ سوگو کننگ کن سلاہ تا جاچ ءِ ہلنگ ءِ۔ تدوک آ سال ڈیٹ ٹو جی ڈی پی ٹی 4 درسد کمتی بسنے، اینخو سال داٹی پین کمتی اتینہ، بروک آ منہ دے اٹی سرسہب ورنا پروگرام نا بناءِ کینہ، فوڈ آئٹمز نا درآمد ءِ کم کننگ کن کشاری بشخ اٹ زرکاری اتنگ اُن،اومیت ءِ کہ اینخو سال 58 کھرب نا ریونیو نا ہدف ءِ عبور کینہ، پاور سیکٹر اٹ ٹیرف اٹ ودکی کننگ ویل آتا ایسری مفک داڑآن نیزگار بندغ آ دباؤ ودک، آئی ایم ایف آن داچرجوئی ٹی مہلت خواہنگک۔ جمعہ نادے آ پارلیمنٹ ہاؤس اٹی وزیر مملکت حوالکاری و شینکاری فرخ حبیب تون اوار پریس کانفرنس اٹی او پارے کہ تدوک آ نن حکومت پٹرولیم مصنوعات آتا نہاد آتا پڑو ءِ کرینے دارداٹ اوگرا سفارش کریسس کہ پٹرول ءِ 8 روپئی و ڈیزل ءِ سوا مسہ روپئی فی لیٹر ودفنگے ولے وزیراعظم نا پارت آ پٹرول بیرہ 4 روپئی فی لیٹر و ڈیزل بیرہ اِراروپئی ودفنگانے ہرانا سوب آن حکومت ءِ اِرا ارب روپئی نا نسخان مسنے۔ اوپارے کہ پٹرولیم مصنوعات آتا نہاد آتے ٹی ودکی جہانی منڈی ٹی تیل انا نہاد آتے ٹی ودکی نا سوب آن مننگ ءِ۔ جنوری، فروری ٹی جہانی منڈی ٹی خام تیل انا نہاد 42 ڈالر فی بیرل ئس وخت اس کہ داوخت آ 80 ڈالر فی بیرل ءِ۔ اوپارے کہ دنیا ٹی پاکستان نا پٹرولیم مصنوعات آتا نہاد 17می نمبرآٹی ءِ و داڈیہہ ٹی نن داسہ ہم غٹ آن کم نہاد آ پٹرولیم مصنوعات فراوان کننگ اُن۔ بھارت اٹی 235 روپئی، بنگلہ دیش اٹی 195 روپئی فی لیٹر ءِ وخت اس کہ پاکستان اٹی 127 روپئی فی لیٹر ءِ۔ اوپارے کہ نن پٹرولیم مصنوعات آتا نہاد آتے ٹی کمتی اتنگ خوانہ ولے داڑکن حکومت ءِ مالی دباؤ ءِ سگوئی تمک۔ شوکت ترین پارے کہ 2018 ء ٹی پٹرولیم لیول 30روپئی ئس ولے داسہ دا دونیم روپئی اسکان بسنے انتئے کہ وزیراعظم عمران خان نا پاننگ ءِ کہ نن الس آ پین بھاریم شاغپنہ۔ اوپارے کہ داوخت آ پاکستان آ ہندن ءُ حکمران اس حکومت کننگ ءِ ہرا نیزگارآتے کن درد تخک۔ اوپارے کہ دنیا ٹی داوخت آ نہاد آتے ٹی ودکی نا سوب کورونادین ءِ۔ امریکہ ٹی افراط زر یک و نیم درسد آن ودسا ہشت درسد اسکان سرمسنے۔ داتدوک آ دہ سال آن 12 سال اٹی افراط زر انا بڑزکو انگا کچ ءِ۔ اوپارے کہ کنوئی آ ایلو گڑاتا نہاد آتے ٹی ودکی داخاطرآن مسنےانتئے کہ مستین نا لاپرواہی تا سوب آن پاکستان فوڈ امپورٹر جوڑ مسنے حالانکہ اگہ نن تینا کشاری بشخ ءِ سوگو کرینہ و تینا پیدوار ءِ ودفینہ تو ننے داحالیت آتا مون تروئی تمیتوکہ۔ داسہ نن کشاری بشخ اٹ زرکاری کننگ اُن تانکہ کشاری پیدوار اٹ ودکی مرے۔ داوخت آ نن خولم، بورہ و دال و سی پیشن آن خواہفنگ اُن۔ وزیراعظم نا پرمان آ خولم نا سرکاری قیمت خرید2040 روپئی فی من آن کم کرسا 1950 روپئی کننگانے ہراڑآن نت انا 20 کلونا تھیلہ 1100 روپئی اسکان بریک۔اوپارے کہ نن بورہ ءِ 90 روپئی کلو بہاکننگ نا فیصلہ کرینن۔
