پاکستان، ڈنمارک اتون ہڑتوم آ کنڈآتا تعلقداری تے خاص اہمیت ایتک، جہانی برادری اوغان الس نا کمکاری کن پبی گام گیج کے، وزیرخارجہ مخدوم شاہ محمود قریشی نا ڈینش ہم منصب تون مذاکرات

اسلام آباد۔ 01اکتوبر (اے پی پی) وزیرخارجہ مخدوم شاہ محمود قریشی پارینے کہ پاکستان، ڈنمارک اتون ہڑتوم آ کنڈآتا تعلقداری تے خاص اہمیت ایتک، اوغانستان اٹی انسانی و زرگزرانی تنکی تون مون تننگ کن جہانی برادری اوغان الس نا کمکاری کن پبی گام گیج کے۔ پاکستان و ڈنمارک نا نیام اٹ ڈل آتا کہول آ مذاکرات جمعہ نادے آ وزارت خارجہ ٹی مس۔ پاکستانی ڈل انا کماشی ءِ وزیرخارجہ مخدوم شاہ محمود قریشی وخت اس کہ ڈینش ڈل انا کماشی ءِ ڈنمارک نا وزیرخارجہ یپے کوفو کرے۔ مذاکرات اٹی ہڑتوم آ کنڈآتا تعلقداری، اوغانستان نا مون آ بروک آ حالیت آتون اوار تین پہ تینی است خواہی نا باندات آ گپ وتران کننگا۔ وزیرخارجہ پارے کہ پاکستان، ڈنمارک تون ہڑتوم آ کںڈآتا تعلقداری ءِ خاص اہمیت ایتک۔ اوپارے کہ جی ایس پی پلس سٹیٹس نا بابت نن پاکستان نا کمکاری آ نن ڈنمارک نا منت وار اُن۔ نن پیشن نا زرکار آتے پاکستان اٹ زرکاری کن بھاز پرکشش آسراتی تننگ اُن وخت اس کہ کاروبار اٹ آسائش نا بابت پاکستان نا جہانی درجہ بندی ٹی گچینی بسنے۔ شاہ محمود قریشی پارے کہ ڈینش کمپنیک، پاکستان اٹ زرکاری نا کمک اٹ داآسودہی تیان فائدہ ہرفنگ کیرہ۔ اوپارے کہ پاکستان و ڈنمارک نا نیام اٹ قابل تجدید توانائی و موسمیاتی بدلی نا بابت ہڑتوم آ کنڈآتا کمکاری ءِ مون آ دننگ سفت نا قابل ءِ۔ ہڑتوم آ ملک آتا پارلیمان اٹ پاکستان و ڈنمارک پارلیمانی فرینڈ شپ پڑک آتا ساڑی گری، پارلیمانی رابطہ غاتا مون آ دننگ نا سوب ءِ۔ وزیرخارجہ اوغانستان نا حالیت آتا بابت پارے کہ نن اسہ ہزار آن زیات ڈینش شاری تے کابل آن رکھ کشنگ اٹ کمک فراوان کرین، کنے خوشی ءِ کہ اوغانستان نا بابت ننا نقطہ نظر اسہ وڑاٹ ءِ۔ اوپارے کہ اوغانستان اٹی ساڑی آ بدلی ٹی کشت وخون و خانہ جنگی نا مفننگ گچین ءُ پلو اسے۔ جہانی برادری اوغانستان اٹی، پاکستان آنبار اجتماعیت نا حامل حکومت نا خواہندار ءِ۔ و وزیرخارجہ پارے کہ گرج داہیت انا ء، کہ اوغانستان اٹی ودی مروک انسانی و زرگزرانی تنکی تون مون تننگ کن جہانی برادری اوغان تا کمکاری کن پبی گام گیج کے، اقتصادی تنکی آن دہشت گرد پڑک آتے اوغانستان اٹ گام تخنگ نا موقع مِلک۔ شاہ محمود قریشی پارے کہ ننے اوغانستان نا بابت اسپائلرآتا ساڑی گری و عزم آن معلومدار مروئی مریک۔ وزیرخارجہ پاکستان اٹی سیکورٹی نا حالیت آتے ٹی گچینی نا رداٹ ڈینش ہم منصب تون ٹریول ایڈوائزری آ نظرثانی نا خواست کرے۔ ڈینش وزیرخارجہ ڈینش شاری تا کابل آن رکھ پیش تمنگ اٹ کمکاری آ وزیرخارجہ مخدوم شاہ محمودقریشی و پاکستانی سرکڑدہ غاتا منت واری ءِ ہرفے۔