اسلام آباد۔ 01اکتوبر (اے پی پی) بنجائی وزیر ہوابازی غلام سرور خان پارینے کہ اسلام آباد انٹرنیشنل ایئرپورٹ اٹ بے وڑی و وڈی خوری نا جاست وپاست ءِ نیب و ایف آئی اے کننگ اٹی ءُ۔ جمعہ نادے آ بڑزکو ایوان نا دیوان اٹی سینیٹر محسن عزیز نا چکاری نوٹس نا ورندی ءِ ترسا اوپارے کہ اسلام آباد انٹرنیشنل ایئرپورٹ نا 6 مئی 2006ء آ بنداو ءِ تخنگا، 38 ارب روپئی نا پی سی ون ئس، پی سی ون آ چندی دور تیٹی نظرثانی مرسا کرے ہراڑآن خڑچ آتے ٹی ودکی مس، تینا مخلوق ءِ خوش کننگ کن 18 پیکجز جوڑ کننگا، ٹھیکہ غاتیا نظرثانی کننگا، ارٹ میکو رن وے پورو الوکہ، بھلو کچ اسے آ بے ڈولی و وڈی خوری مون آ بس۔ اوپارے کہ پی اے سی، سینیٹ و قومی اسمبلی نا قائمہ کمیٹی تیٹی دا باندات ءِ چست کننگا، چیف جسٹس دانا نوٹس و دامعاملہ جاست وپاست کن چندی جاست وپاستی ادارہ غاتیا گدریفنگا، نیب و ایف آئی اے داباندات نا جاست وپاست ءِ کننگ ءُ، زموارآتے ہلنگ پننگک۔ سینیٹر نزہت صادق نا چکاری نوٹس نا ورندی ٹی وزیر ہوابازی پارے کہ سپریم کورٹ آف پاکستان نا پرمان آ پی آئی اے ملازم آتا ڈگری تے چیک کننگا، 1800انجینئرز، ٹیکنیشنز و ایلو ڈگریک جعلی پیش تمار، اوفتے ملازمت آتیان کشنگا۔ عدالت آک اوفتا درخواست آتے مسترد کریر، ہندارداٹ پائلٹس نا ڈگری تے چیک کننگا، 262 پائلٹ آتا لسینک شکبر ئسر ، انکوائری کمیٹی اوفتا انکوائری ءِ کرے۔ 50 پائلٹ آتا لسینک جعلی پیش تمار اوفتے برخاست کننگا، 34 ءِ معطل کننگا، داباندات اٹی سول ایوی ایشن اتھارٹی نا ہرا آفیسرآک اوار ئسر اوفتے ملازم آتیان برخاست کننگا، ایف آئی اے اوفتے دزگیرکرے۔ اوپارے کہ این سی او سی نا پارت آ کورونا نا رداٹ مئی 2021اٹی جہاز آتا کچ ءِ کم کننگا، اووربکنگ کروک آ ایئرلائن تے جرمانہ کننگا۔
