اسلام آباد۔ 01اکتوبر (اے پی پی) وزیراعظم نا سلاہکار پارلیمانی امور ڈاکٹر ظہیر الدین بابر اعوان پارینے کہ پاکستان نا افریقی ملک آتون واپاری کچ اٹ ودکی مسنے، افریقی ملک آتون رابطہ غاتے ودفنگ کن لک افریقہ پالیسی گام گیج آتیا عملدرآمد کننگ انگ ءِ۔ جمعہ نادے آ بڑزکو ایوان نا دیوان اٹی سینیٹر سیمی ایزدی نا سوج انا ورندی ٹی اوپارے کہ افریقہ نا آبادی دنیانا کل آبادی نا 15 درسد ءِ، پاکستان نا افریقی ملک آتون واپاری تعلقداری تے ودفنگ نا بھلو وارخواہی اس ساڑی ءِ ۔ اوپارے کہ پاکستان افریقی منڈی تیٹی واپاری کمکاری ءِ ودفنگ کن نمائش و کانفرنس آتون اوار چندی گام گیج کرینے، کورونا دین آن پد ہم جولائی 2020آن مئی 2021اٹی افریقہ کن برآمد آتے ٹی ودکی مسنے، دابرآمد آتے ٹی دوائی، ٹیکسٹائل، سرمٹ، ٹیکٹر، بورہ نا مصنوعات، کاغد، پیپربورڈ و ترپال آک اوار ءُ۔
