کوئٹہ۔ 01اکتوبر (اے پی پی) گوادر پورٹ اتھارٹی نا آپریشن ٹیم سمندری طوفان گلاب نا رداٹ ماہی گیر آتا کشتی تے منی پورٹ کے جے ٹی آ ریسکیو کننگ نا بناءِ کرینے۔ چیئرمین گوادر پورٹ نصیر خان کاشانی نا خصوصی پارت آ او آئی سی منی پورٹ (فش ہاربر) انجینئر لیاقت بلوچ ناکماشی ٹی سمندری طوفان گلاب نا رداٹ ماہی گیرآتا کشتی تے نسخان آن بچفنگ کن منی پورٹ کے جے ٹی آ کرین تا کمک اٹ ریسکیو کننگ انگ ءِ۔ انجینئر لیاقت بلوچ پارے کہ ہراماہی گیر نا کشتی ءِ داتم اسکان کشنگتنے او تینا چاروکی ٹی تینا کشتی تے رکھ ءُ ہند اسے آ گدریفنگ کن گوادر فش ہاربر آ سرمرے ۔ یات سلے کہ ہرطوفان نا وخت آ گوادر پورٹ اتھارٹی نا آپریشن ٹیم ماہی گیر آتا کشتی تے بیدس معاوضہ غان خشکی آ لنگرانداز کیک و طوفان نا چٹنگ آن پد اوفتے دُوارہ سمندر اٹ ہلک۔
