کوئٹہ۔ 01اکتوبر (اے پی پی) وزیراعلیٰ بلوچستان جام کمال خان چین نا 72 می سال دے انا وخت آ چینی الس ءِ مبارکبادی تسنے۔ اوتینا تہنیتی کلہواٹی پارینے کہ پاکستان چین اتون تینا سدابہار یکتا سنگتی آ گمر کیک۔ پاک چین سنگتی سوگو آن سوگو مننگ ءِ و سی پیک دیرپا تعلقداری تا بابت ننا تین پہ تینی عزم انا زندہ ءُ درور اسے۔ اوپارے کہ پاک چین سنگتی نا سفر دہائی تیا تالان ءِ، دانا دنگ غٹ زند انا بشخ آتسکان ودانے۔ ہراہم موقع غاتیا چینی سرکڑدہ غاک پاکستان تون تفینو۔ اوپارے کہ ساڑی آ منہ سال اٹی چین پاکستان اٹ زرکاری نا رخ ءِ موڑ تسنے، سی پیک نا سوب آن پاکستان اٹ ارب آ روپئی نا زرکاری مننگ ءِ، سی پیک پاک چین سنگتی نا شاندار ءُ نمونہ اسے و داپاکستان نا شونداری ٹی گیم چینجر مریک و داوخت آپاکستان اٹ ہزار آ چینی پاکستان اٹ چندی بشخ آتے ٹی کاریم کننگ ءُ۔ وزیراعلیٰ پارے کہ سی پیک ڈیہہ ٹی مثبت بدلی تا پیامبر جوڑمریک و داپاننگ بے سوب مفک کہ پاک چین سنگتی سمندر آن کُڑمب، شاد آن ہنین و ہمالیہ نا ٹُل آن بڑزءِ ہراڑآ ہرپاکستانی گمرکیک۔ اوپارے کہ پاکستان نا حکومت و الس کشمیر نا ویل آ چین نا موقف ءِ بھاز قدر انا نظراٹ ہریرہ۔ اوپارے کہ چین نا کنڈآن کورونا دین اٹی ویکسین و ایلو المی آ گڑاتا فراوانی آ مچ آ قوم چینی الس و حکومت نا منتوار ءِ۔
