اسلام آباد۔ 01 اکتوبر (اے پی پی) بنجائی وزیر مواصلات مراد سعید پارینے کہ سی پیک نا غٹ آن بھلا فورم جے سی سی چترال دیر، سوات موٹروے و پشاور ڈی آئی خان موٹروے ءِ سی پیک اٹ اوار کرسا داعلاقہ غاتے شونداری نا خوشخبری اس بنفینے، جگلوٹ اسکردو سڑک 30 اکتوبر آ پورو مریک ہرانا بناءِ وزیراعظم عمران خان کیک۔ نیشنل ہائی ویز اتھارٹی نا کنڈآن جمعہ نادے آ جاری بیان نا رداٹ داخیال آتا درشانی ءِ او زیرتکمیل ڈٹ آتا سرجم آتا گپ وتران اٹی کرے۔ این ایچ اے نا کنڈآن اسہ ویڈیواس ہم جاری کننگانے۔ ہراٹی جگلوٹ اسکردو ڈٹ انا 2019و 2021نا ندارہ ءِ نشان تننگانے۔ ویڈیو ٹی 2019 نا خوفناک و 2021اٹی سڑک آ کاریم آن پد انا دلکش ندارہ ءِ ہم نشان تننگانے۔ بنجائی وزیر مواصلات پارے کہ وزیراعظم عمران خان نا کماشی ٹی السی آسودہی نا ڈٹ آتون سڑک آتا تفنگ آہم کاریم برجاءِ۔ اوپارے کہ وزیراعظم عمران خان سیل و سوات نا مون آ دننگ کن چترال و گلگت بلتستان شاہراہ نا ہم منظوری ءِ تسنے۔ مراد سعید پارے کہ دااہم شاہراہ غا دسمبر اٹ کاریم بناکیک۔ اوپارے کہ گلگت بلتستان سی پیک نا درگہ ءِ و سی پیک دا ڈیہہ نا شونداری نا ضامن ءِ ، دااہم شاہراہ غان داعلاقہ نا سیل وسوات اٹی ودکی مریک و زرگزرانی سرجز آتا بنامریک، اوپارے کہ چترال اٹی مسہ ڈٹ داسال انا ایسراسکان بناکیرہ۔ مراد سعید پارے کہ این ایچ اے برجاڈٹ آتے ترند تر و شفاف وڑاٹ پورو کننگ ءِ، بنجائی وزیر پارے کہ این ایچ اے پوسکن آ ڈٹ آتا وخت آ بناو سی پیک ءِ گچین وڑاٹ مون آ دننگ ءِ، مراد سعید پارے کہ سی پیک نا غٹ آن بھلا فورم جے سی سی چترال دیر، سوات موٹروے و پشاور ڈی آئی خان موٹروے ءِ سی پیک اٹ اوار کرسا داعلاقہ غاتا شونداری نا خوشخبری اس بنفینے، تدوک آ ہفتہ مروک آ جے سی سی نا سی پیک نا بابت فیصلہ غاتیان پاکستان اٹ شونداری و شونہالی نا پوسکن آ دور بناکیک۔
