اسلام آباد۔ 30ستمبر (اے پی پی) وزیراعظم عمران خان پارینے کہ چین پاکستان اقتصادی راہداری (سی پیک) پاکستان نا زرگزرانی و راجی شونداری ٹی کمکار مریک، سی پیک نا اولیکو ریسہ ٹی توانائی و مواصلات نا بشخ آتیا چکار کننگا، داسہ صنعت ءِ مون آ دننگ انگ ءِ و کشت وکشار نابشخ اٹی پوسکن آ ٹیکنالوجی ءِ درستی راستی کرفنگ انگ ءِ، مٹیاری آن لاہور ٹرانسمیشن ڈٹ آن لائن لاسز ءِ چار درسد اسکان کم کننگ اٹ کمک رسینگک ہرامہالو 17 درسد نا خڑک ئس، اسہ درسد لائن لاسز نا مطلب ارب آ روپئی نانسخان ءِ ہرا بجلی نا صارف آتے سگوئی تمک، سی پیک پاکستان کن بھلو اہم ءُ ڈٹ اسے، داڑآ کاریم نا رفتار ءِ پین ترند کننگک۔ وزیراعظم عمران خان پنچ شنبے نادے آ داڑے مٹیاری آن لاہور 660کے وی ٹرانسمیشن لائن ڈٹ انا بنائی دود آن تران کرسا داخیال آتا درشانی ءِ کرے۔ اوپرے کہ 886کلومیٹر مریس ڈٹ انا غٹ آن بھلا خوبی اونا پوسکنی ءِ و اسٹیٹ آف دی آرٹ ڈٹ آن بجلی نا ٹرانسمیشن نا لائن لاسز 4 درسد نا خڑک ءِ وخت اس کہ داکان مست ملک اٹی لائن لاسز نا کچ 17 درسد ءِ۔ اوپارے کہ اسہ درسد لائن لاسز نا مطلب ارب آ روپئی تا نسخانءِ و لائن لاسز نا ودنگ آن براہ راست الس زہمی مریک انتئے کہ دا لاسزءِ الس ءِ سگوئی تمک۔ وزیراعظم پارے کہ ڈٹ آن بجلی نا فراوانی نا نسخانک کم مریرہ و داڈٹ بھاز زوت تینا نہاد ءِ پورو کیک۔ وزیراعظم عمران خان پارے کہ سی پیک نا صدر نا اسہ فلیگشپ پروگرام اسے ہراڑآ پاکستان اٹ ترندی اٹ کاریم کننگ انگ ءِ۔ اوپارے کہ کورونا نا سوب آن گڑاس ویل مون تروک ئس ولے داسہ سی پیک ڈٹ ترندی اٹ مون آ ہِننگ ءِ۔ وزیراعظم پارے کہ سی پیک نا رداٹ اول بجلی نا پیدوار، ولدا سڑک آتا تفنگ و داسہ بجلی نا ٹرانسمیشن آ چکار کننگ انگ ءِ۔ اوپارے کہ لائن لاسز نا سوب آن بجلی مفننگ نا سوب آن صارف آتسکان سپلائی ٹی مشکل ءِ ہراتکلیف نا سوب ءِ ہرانا سوب ٹرانسمیشن نا ویل آک ءُ۔ وزیراعظم پارے کہ مٹیاری آن لاہور 4ہزار میگاواٹ بجلی نا فراوانی نا دا ڈٹ لائن لاسز اٹ کمتی نا بابت کمکار مریک۔ اوپارے کہ سی پیک پاور جنریشن و سڑک آتا تفنگ آن پد داسہ ٹرانسمیشن نا مرحلہ اسکان سرمسنے اوکان پد صنعتکاری آ چکارتخنگ انگ ءِ تانکہ قومی دولت اٹ ودکی آن ملکی وام تے پدی تننگ مرے۔ اوپارے کہ صنعت وکشت وکشار نا بشخ آتے ٹی پوسکن آ ٹیکنالوجی نا کاریم اٹ اتنگ آن تینا کٹیا ءِ ودفسا ملک انا وام تے کم کینہ۔ وزیراعظم عمران خان دا عزم انا درشانی ءِ کرے کہ سی پیک ڈٹ آتا رفتار داسہ پین ترندمریک، کورونا دین انا سوب آن ہراویل آک مون تروک ئسر ہراننکن امتحان اس ئسر۔ اوپارے کہ کورونا دین انا سوب آن جہانی کہول آ سپلائی چین نا نظام زہمی مننگ نا نتیجہ ٹی غذائی مصنوعات آتا نہادآک ودانو ہراعارضی ءُ۔ وزیراعظم پارے کہ ویکسین نا کمک اٹ کورونا دین انا مون ءِ توننگ انگ ءِ ہراڑآن اونا خوف ہم کم مننگ ءِ۔ اوپارے کہ سی پیک نا ڈٹ آتیا کاریم ترند مریک و کبینی نا عارضی ویل آک ہم چٹرہ۔

متعلقہ مضامینمصنف کی طرف سے مزید