اسلام آباد۔ 30 ستمبر (اے پی پی) وزیراعظم عمران خان پارت کرینے کہ کوزہ مروک آ ڈغار تے پدی ہلنگ نا کانود ناسختی اٹ نافذ کننگ ءِ پک کننگے۔ داپارت ءِ او پنچ شنبے نادے آقومی رابطہ کمیٹی ہاؤسنگ و تعمیرات نا دیوان نا کماشی ءِ کرسا تس۔ دیوان اٹی وزیر مملکت حوالکاری وشینکاری فرخ حبیب، خصوصی کمکار ڈاکٹر شہبازگل و تعلقدار بڑزکو آفیسر آک ساڑی ئسر۔ وزیراعظم دیوان اٹی گپ وتران کرسا پارے کہ حکومت چاگڑدی رکھ اکن جنگل آتا ڈغارتا رکھ ءِ پک کننگ ءِ۔ اوپارے کہ فوڈ سیکورٹی و موسمیاتی بدلی داوخت آ بشمول پاکستان مچ آ دنیا نا غٹ آن اہم ویل ءِ ۔ وزیراعظم پارے کہ حکومت کوزہ مروک ڈغارتے پدی ہلنگ کن گام گیج کننگ ءِ، کیڈسٹرل میپنگ آن ڈیڈ کیپٹل نا پیدواری و اونا گچین کاریم اٹ اتنگ ممکن مننگ کیک۔ دیوان ءِ چیئرمین سی ڈی اے اسلام آباد اٹ برجاشونداری ڈٹ آتا بابت حوال تس۔ اوپارے کہ سیکٹر1-15نا پوروی ءِ اسہ سال انا گونڈ ءُ مد اسے ٹی پک کننگا، پوسکن آ پاکستان ہاؤسنگ نا رداٹ فراش ٹاؤن و ایلو انفراسٹرکچر نا ڈٹ آتے ہم زوت پورو کننگک۔اوپارے کہ اسلام آباد اٹی جنگل آتا ڈغارنا ریکارڈ نا ڈیجیٹلائزیشن ہم کم وود پورو کننگانے۔ دیوان ءِ سروئیر جنرل نا کنڈآن کیڈسٹرل میپنگ آ ہم سرجم حوال تننگا۔ چیئرمین سی ڈی اے پارے کہ اسلام آباد ولاہور تون اوار مچ آ ملک اٹی ڈیجیٹل میپنگ و سرکاری ڈغار تا پیدواری آ کاریم ترندی اٹ برجاءِ۔ دیوان اٹی اسپیشل /سائیٹ ڈویلپمنٹ زون تیا ہم حوال تننگا۔ چیئرمین سی ڈی اے پارے کہ ڈویلپمنٹ زون پیری اربن سیٹلمنٹس ءِ بنداوی آسراتی تا فراوانی ءِ پک کینہ، ڈٹ آن ڈغارنا گچین کاریم اٹ اتنگ و غیرکانودی سوسائٹی تا توننگ اٹ ہم کمک رسینگک۔
