اسلام آباد۔ 30 ستمبر (اے پی پی) چین نا سفیر نونگ رونگ پارینے کہ مٹیاری آن لاہور ٹرانسمیشن لائن ڈٹ آن لکھ آ اُرائی و صنعتی صارف آتے بے سلنگ آن بجلی ملک، سی پیک نا دہ می جے سی سی دیوان اٹی کشت وکشار، صنعت و آئی ٹی نا بشخ آتے ٹی شریداری نا ودفنگ آ امنا مسنے۔ پنچ شنبے نادے آ داڑے 886 کلومیٹر مریس مٹیاری آن لاہور 660 کے وی ٹرانسمیشن ڈٹ انا بنائی دود آن تران کرسا چینی سفیر پارے کہ جہانی آب انا داڈٹ پاکستان اٹ بجلی نا ویل آتا چٹفنگ اٹ کمکار مریک و پاکستان نا زرگزران شون ہلیک۔ اوپارے کہ ڈٹ آن ملک اٹی لکھ آ صنعتی و اُرائی صارف آتے بے سلنگ آن بجلی دوئی مریک و دا ڈٹ پاکستان اٹ بجلی نا ویل آتا چٹفنگ اٹ کمکار مریک۔ اوپارے کہ مٹیاری آن لاہور ٹرانسمیشن ڈٹ رکھ و پائیدار ءِ ہرا جہانی آب انا رداٹ جوڑ کننگانے ہراڑآن ملک انا سویلی و قطبی بشخ آتے ملفنگ اٹ کمک ایتک۔ اوپارے کہ پت انا قابل توانائی نا دوئی کننگ آن پاکستان نا صنعتی شونداری ءِ مون آ دننگک۔ اوپارے کہ ڈٹ انا ٹرائل سرسہب مسنے و دانا سرسہب آپریشن ستاکڑزک ہرا پاکستان نا راجی و زرگزرانی شونداری ٹی کمک ایتک۔ اوپارے کہ سی پیک نا فلیگ شپ ڈٹ پاکستان کن گیم چینجر اس مریک ہراڑآن زرگزرانی شونداری نا ہدف آتا دوئی کننگ ءِ پک کننگ مریک۔ چینی سفیر پارے کہ سی پیک نا رداٹ داتم اسکان چندی ڈٹ آتیا 25 ارب ڈالر آن زیات نا زرکاری مسنے۔ اوپارے کہ سی پیک ڈٹ انا رداٹ پاکستان نا راجی و زرگزرانی شونداری آ چکار کننگ انگ ءِ و سی پیک نا رداٹ پاک چین صنعت، سائنس و ٹیکنالوجی و کشت وکشار تون اوار ایلو بشخ آتے ٹی شریداری ءِ ودفنگ انگ ءِ۔ اوپارے کہ 2021پاک چین سفارتی تعلقداری نا 70می سال دے انا سال ءِ و پاکستان و چین نا تین پہ تینی تعلقداری ہرہنوک آ دے اتون سوگو و ودنگ ءِ۔
