حکومت نا کشارگرو بزغرآتا ویل آتے اولیتی بنداو تیا ایسر کننگ نا فیصلہ، بزغرآک تینا ویل آتے براہ راست سٹیزن پورٹل آ درج کرفنگ کیرہ، وزیراعظم ڈیلیوری یونٹ

اسلام آباد۔ 30 ستمبر (اے پی پی) حکومت کشارگرو بزغرآتا ویل آتے اولیتی بنداو تیا ایسر کننگ نا فیصلہ کرینے ہرانا رداٹ پاکستان سٹیزن پورٹل آ بزغرآتے کن خصوصی کیٹیگری اس الاٹ کننگانے۔ وزیراعظم آفس نا کنڈآن پنچ شنبے نادے آ دا بابت جاری کروک آ پارت آتے ٹی بزغرآتا ویل آتا ایسری کن صوبائی حکومت آتے خاص پرمان جاری کننگانے ہرافتا رداٹ مچ آ ملک اٹی تعلقدار آفیسر آتے بزغرآتا غاوتا دمدستی ایسری کن گام گیج نا پارت کننگانے۔ وزیراعظم عمران خان نا کنڈآن جاری پارت آتے ٹی پاننگانے کہ سرکاری آفیسر بزغرآتا ویل آتے اولیتی بنداو تیا ایسر کننگے۔ دابابت وزیراعظم ڈیلیوری یونٹ(پی ایم ڈی یو) غٹ صوبائی حکومت آتے مراسلہ جاری کرینے۔ ہرانا رداٹ داسہ بزغرآک تینا ویل آتے براہ راست سٹیزن پورٹل آ درج کرفنگ کیرہ۔ وزیراعظم آفس پارے کہ تینا ویل آتا ایسری کن داسہ کشارگرو بزغرآتے سرکاری دفترآتا چکرءِ خلوئی تمپک۔ وزیراعظم آفس پارت کرے کہ غٹ چیف سیکرٹریک بزغرآتا ویل آتا ایسری آ آفیسرآتا سہ ماہی کارکڑد رپورٹ اس مرتب کیر۔ مراسلہ ٹی غٹ صوبہ غاتے ٹی بزغرآتا ویل آتے کن 123سرکاری آفیسر آتے زمواری تننگانے و دابابت خیبرپختونخوا نا 43 وخت اس کہ پنجاب نا 57آفیسر آتے زمواری تننگانے۔ ہنداوڑ کشارگرآتا ویل آتا ایسری کن بلوچستان اٹی 12، سندھ 4، بنجا4، آزادکشمیر 2و گلگت اٹی اسہ سرکاری آفیسر اسے زمواری تننگا۔ مچ آ ملک انا بزغرآک داسہ پی ایم پورٹل آ کارڈ، بج، دیر انا دُزی، فصل، غلہ نا نہاد آتیا غاو تے درج کرفنگ کیرہ۔ داکان بیدس جوجک کسفوک دوائی و ایلو52ویل آتا ایسر ہم وخت آ ممکن مننگ کیک۔وزیراعظم آفس پارت کرے کہ مچ آ ملک اٹی دا بابت کشارگر و بزغرآتا آگاہی کن ضلعی کہول آ خصوصی مہم اس ہم چلیفنگے۔