اسلام آباد۔ 29ستمبر (اے پی پی) وزیراعظم عمران خان پارینے کہ پاکستان نا شونداری کن غٹ علاقہ غاتے اسہ وڑ شون تروئی مریک، 70سال اٹی ہراعلاقہ غاتے شونداری آن محروم تخنگا اوفتے بڑزادننگ ءِ ننا حکومت اولیت ایتک، 2013ء ٹی جوڑ کروک آ موٹروے نا خڑچ اینو آن 20کروڑ روپئی فی کلومیٹر زیات ئس، ایف آئی اے ءِ دا اختیار تسونن کہ او داوڑنا ڈٹ آتا جاست وپاست ءِ کے، قوم انا مون آ داوڑنا غٹ سرجم آتے مون آ اتینہ، پاکستان نا غٹ آن بھلا ویل کرپشن ءِ ، وسیلہ غاتیان پد ہم دنیا ٹی نیزگار ملک آتا نیزگاری نابنداوی سوب ہندا کرپشن ءِ۔ او چارشنبے نادے آ بلوچستان اٹی جھل جھاؤ۔ بیلہ شاہراہ نا بحالی و اپ گریڈیشن ڈٹ انا بنداو نا دود آن تران کریکہ۔ داوخت آ وزیراعلیٰ بلوچستان جام کمال خان، بنجائی وزیر مواصلات مراد سعید ئسک ہم تران کریر۔ داوخت آ ڈپٹی اسپیکر قاسم سوری ہم ساڑی ئسک۔ وزیراعظم عمران خان تران کرسا پارے کہ ن لیگ نا دور اٹی جوڑ مروک آ سڑک آتا نسبت 20 کروڑ روپئی کم خڑچ آن سڑک جوڑ کننگ اُن، مسکوہی دور اٹی سڑک آتا تفنگ اٹ کرپشن نا جاست وپاست ءِ کننگ نا پارینن۔ اوپارے کہ ایف بی آر ءِ پورو مینڈیٹ تسونن کہ او جاست وپاست کرسا راستکی تے قوم انا مون آ اتے و قومی سرمایہ نا زیان نا زموارآتا تعین ءِ کے۔ وزیراعظم پارے کہ جھل جھاؤ۔بیلہ شاہراہ بلوچستان نا چندی علاقہ غاتے ملفنگ کن بھاز اہم ءُ ڈٹ اسے۔ وزیراعظم داوخت آ بشخ ہلوک آتے پارے کہ سکول دوراٹی ہراتم او سیل و سواتی دورہ غا ہنزہ غا ہناتو اووخت آ چنکا چنکا خلق آتے ٹی مخلوق ننے جم و جوش اٹ بخیر کرے۔ اینو شاہراہ تا سوب آن ہموڑے سیل و سوات ءِ داخہ در مون آ دننگاکہ ہموڑے اُراتے ٹی ہم مخلوق کمرہ کراغا تننگ نا بناءِ کرینے۔ ہموجاگہ نا حالیت پورو بدل مسنے۔ بلوچستان اٹی ہم اگہ شاہراہ تیا ہنداوڑ چکار کننگے تو داڑے سیل و سوات نا بھلو وارخواہی اس ارے۔ بلوچستان پاکستان نا کل رقبہ نا 40 درسد ءِ۔ اودے مستین اٹ گوجالنگا انتئے کہ ہراحکومت تینا مد و گچین کاری تے مون آتخک او بلوچستان نا شونداری ٹی است خواہی ہلنگ نا جاگہ غا ہراڑے سیاسی فائدہ زیات مرے ہموڑے شونداری کن گام گیج کرسا کرے۔ ہنداخاطرآن بلوچستان پدی سلیس۔ ننا حکومت 70سال اٹی پسماندہ رہینگوک آ علاقہ غاتے شون تننگ ءِ تینا اولیت کرینے۔ اوپارے کہ چین سی پیک نا دیکی روٹ ءِ گچین داخاطرآن کرے کہ دیکی چین شونداری نا عمل اٹ پدی سلیسوسس اودے گوادر تون اوار کننگ انگ ءِ۔ وزیراعظم پارے کہ چین مریس مدتی حکمت عملی اس اختیار کرینے ۔ نن ہم ہموکنڈآ ہِننگ اُن۔ ملک مریس مدتی ڈٹ آتیان شونداری نا کنڈآ کاہک۔ وزیراعظم پارے کہ بلوچستان اٹی پسماندگی نا زموار داجاگہ نا سیاستدان ہم اریر ہرافتا سوچ بیرہ تینا حلقہ نا شونداری و گچین کاری تے کٹنگ نا ئس۔ وزیراعظم پارے کہ احساس پروگرام اٹ سندھ اٹی ننا حکومت مفننگ آن پد ہم 34 درسد بشخ سندھ ءِ تسن انتئے کہ ہموڑے نیزگاری نا کچ زیات ءِ۔ ننا حکومت نا چکار بلوچستان آٹے۔ داڑے شاہراہ تا مچ آ پاکستان نا مقابلہ ٹی غٹ آن زیات گرج ءِ۔ ننا کوشست ءِ کہ ہراتم تینا سکورکارڈ ءِ نشان ایتن تو اوٹی غٹ آن زیات شونداری بلوچستان اٹی مرے۔ بنجائی و صوبائی حکومت اواری اٹ بلوچستان اٹ بے مٹ ءُ شونداری اس ہلساکارہ۔ وزیراعظم مراد سعید و اونا ٹیم ء، خراج تحسین پیش کرساپارے کہ سڑک آتے جوڑ کننگ مشکل ءُ کاریم اس اف ولے کم خڑچ آ آب اٹ سڑک جوڑ کننگ کمال اسے۔ وزیراعظم عمران خان پارے کہ پاکستان نا غٹ آن بھلا ویل کرپشن ءِ، دامسخت کن الس نا پیسہ و خراج ءِ دُزی کننگک۔ وسیلہ غاتیان پد ہم دنیا ٹی ہراملک آک پدی سلیسونو۔ اونا بنداوی سوب وڈی خوری ءِ ہرا ملک شونہال ءِ ہموڑے کرپشن اف۔ وزیراعظم پارے کہ این ایچ اے نا کنڈآن تروک آ حوال اٹی 2013ء ٹی جوڑ مروک آ سڑک آتا فی کلومیٹر خڑچ بھاز زیات ئس خاص وڑاٹ اینو ہراتم روپئی نا مقابلہ ٹی ڈالر نا نہاد و کبینی ءِ مون آ تخنگے تو 2013ٹی داخہ در زیات خڑچ مننگ ظلم اسے۔ داڑآن اخس پیسہ جوڑ کننگا، دانا جاست وپاست ءِ کرسا قوم انا مون آ اتینہ۔ داٹی ہچ ءُ شاہدی اسے نا ہم گرج اف۔ قوم کرپشن آن مروک آ نسخان تیان بایدے معلومدار مرے۔ دازرآن پین اخس ڈٹ آتے پورو کننگ مسکہ ہراڑآن پسماندگی نا چٹنگ ممکن ئس۔
