اسلام آباد۔ 29 ستمبر (اے پی پی) وزیراعظم عمران خان پارینے کہ حکومت برآمد کنندگان آتے ہرممکن آسراتی فراوان کننگ ءِ، برآمد آتا کچ ءِ ودفنگ کن غیرروایتی مصنوعات آتیا چکار کننگے و پاکستانی سفارتخانہ غاتے ٹی تعینات آفیسر آتے کن ہدف متعین کننگے۔ داخیال آتا درشانی ءِ او چارشنبے نادے آ برآمد آتے ودفنگ نا بابت جاچ دیوان نا کماشی ءِ کرساکرے۔ داوخت آ بنجائی وزیر خزانہ شوکت فیاض ترین، سلاہکار واپار عبدالرزاق داؤد، سلاہکار قومی سلامتی ڈاکٹرمعید یوسف و سینئر آفیسر آک ہم ساڑی ئسر۔ دیوان اٹی کامرس ڈویژن تقابلی جاچ پیش کرسا معلومدار کرے کہ سال 2015-18آن سال 2020-21اٹی ویلیو ایڈیڈ برآمد آتے ٹی 3.8ارب ڈالر نا ودکی مس، ہندا مد اٹی غیرروایتی مصنوعات آتا برآمد آتے ٹی 2.7 ارب ڈالر نا ودکی مس، داودکی ساڑی حکومت نا زرکاردوست پالیسی و برآمد کنندگان تے تروک آ آسراتی تا سوب آن ممکن مننگ کرے۔ دیوان ءِ معلومدار کننگاکہ روایتی وڑاٹ پاکستان آن ٹیکسٹائل نا مصنوعات برآمد کننگاکہ ولے برآمد آتا کچ ءِ ودفنگ کن غیرروایتی مصنوعات بشمول معدنیات، فوڈ پراڈکٹس، فروٹ، انفارمیشن ٹیکنالوجی، سرامکس پین پین برآمد کننگ کن گام گیج کننگ انگ ءِ۔ وزیراعظم عمران خان پارے کہ حکومت برآمد کنندگان تے ہرممکن آسراتی فراوان کننگ ءِ۔ اوپارے کہ برآمد آتے ٹی ودکی کن مصنوعات آتے ٹی تنوع اتنگ و جغرافیائی وڑاٹ ہمو ملک آتیا چکار کننگے ہراڑے پاکستانی مصنوعات آتا مارکیٹ ساڑی مرے۔ اوپارے کہ پیشن نا ملک پاکستانی سفارت خانہ غاتے ٹی تعینات آفیسر آتے کن برآمد آتے ٹی ودکی کن ہدف متعین کننگے و ہندا بنداو آ اوفتا کارکڑد ءِ ہُننگے۔
