اسلام آباد۔ 29 ستمبر (اے پی پی) صدر مملکت ڈاکٹر عارف علوی صوبائی حکومت آتیا زور شاغانے کہ او بلدیاتی حکومت آتا بابت تینازمواری تے پورو کیر، بلدیاتی نظام آن جمہوریت سوگو مریک وخت اس کہ اسلامی اصول آتا رداٹ الس نا شیفکو کہول آ راجی آسراتی ٹی کمک رسینگک۔ داخیال آتا درشانی ءِ او چارشنبے نادے آ ہندی حکومت آتا بابت قومی کانفرنس آن تران کرساکرے۔ اوپارے کہ داکانفرنس اٹی ہندی حکومت آتا بابت امنائی سلاہ ودی کننگ نا کوشست کننگا، آئین پاکستان اٹی ہم کیہی وار ہندی حکومت آتا ذکر ءِ کننگانے۔ اوپارے کہ ریاست گچین بلدیاتی نظام نا زموارءِ و اونا است بڈی ءِ کیک، ولے داسہ دا صوبائی ءُ معاملہ اسے و صوبہ غاتے بلدیاتی نظام نا ٹہیفنگ نا بابت گام گیج کننگ نا گرج ءِ۔ اوپارے کہ واکداری تا بشخنگ جمہوریت نا حسن ءِ، جمہوری حکومت اٹ واکداری تے شیفکو کہول آ گدریفنگک، آمریت نا دور اٹی بلدیاتی نظام آ زیات انحصار کننگک۔ اوپارے کہ دنیا نا متکن آ تہذیب دریاتا دامون ایمون ساڑی ئسر، دریائے سندھ انا تہذیب اٹ بلدیاتی نظام نا آثار خننگک انتئے کہ دادوراٹی سیوریج و دیر انا جوان بست وبند ئس۔ اوپارے کہ بلدیاتی نظام نا بابت مستین اٹ گڑاس خامی ئس ولے داسہ دابابت آئین و کانود اٹ وسعت اتنگ نا گرج ءِ۔ اوپارے کہ دنیا ٹی ہر ملک انا جمہوریت ایلو تیان جتا مریک، ہنداوڑ بلدیاتی نظام ہم اسہ وڑ مفک۔ اوپارے کہ ہندی کہول آ اسہ ایلو نا جھگڑہ جرگہ و پنچایت نا کمک اٹ ایسر کننگک۔
