اسلام آباد۔ 29 ستمبر (اے پی پی) اسپیکر قومی اسمبلی اسد قیصر تون آذربائیجان نا سفیر خضرفرہادوف چارشنبے نادے آ پارلیمنٹ ہاؤس اٹ اوڑدہی کرے ہراٹی ہڑتوم آ کنڈآتا تعلقداری اہم علاقائی و جہانی و تین پہ تینی است خواہی نا ایلو باندات آ گپ وتران کننگا۔ اسپیکر قومی اسمبلی پارے کہ آذربائیجان ڈیہہ نا اسہ اہم ءُ ملک اسے، پاکستان آذربائیجان تون تینا خڑکی برادرانہ تعلقداری تے بھاز اہمیت ایتک۔ اسد قیصر پارے کہ ہڑتوم آ برادر ملک آتے ٹی تعلقداری مذہب، ایلمی و تین پہ تینی شرف آ سوگو بنداوتیاٹی ءِ، پاکستان آذربائیجان تون پارلیمانی و زرگزرانی رابطہ غاتے مون آ درسا تعلقداری تے پین سوگو کننگ نا خواہندار ءِ۔ اوپارے کہ السی و واپاری کہول آ رابطہ غاتے مون آ درسا ہڑتوم آ کنڈآتا تعلقداری تے پین سوگو کننگ مریک، ہڑتوم آ ملک آتے ٹی واپار، تعلیم، توانائی، جان جوڑی وایلو بشخ آتے ٹی کمکاری نا بھلو وارخواہی اس ساڑی ءِ، پارلیمان دابشخ آتے ٹی کمکاری ءِ پک کننگ کن پبی کڑد ادا کیک۔ اسد قیصر پارے کہ ہڑتوم آ برادر اسلامی ملک آتا نیام اٹ زرکاری و واپاری کچ اٹ ودکی نا بھلو وارخواہی اس ساڑی ءِ۔ اسلام آباد اٹی مروک آ پائیکو کانفرنس اٹ پارلیمانی ڈل اتون اوار آذربائیجان نا مجلس ملی نا اسپیکر غفاروف نا بشخ ہلنگ ستاکڑزک۔ پاکستان آذربائیجان نا کشمیر نا ویل آ دوٹوک موقف ءِ قدر انا نظراٹ ہرک۔ آذربائیجان نا سفیر پارے کہ آذربائیجان پاکستان تون تینا دوستانہ و برادرانہ تعلقداری تے قدرانا نظراٹ ہرک۔ آذربائیجان پاکستان تون تعلقداری تے پین ودفنگ نا خواہندار ءِ۔ پارلیمانی سفارتکاری ہڑتوم آ کنڈآتا تعلقداری تے سوگو کننگ اٹ اہم کڑدادا کننگ کیک۔ علاقائی رابطہ غاتے مون آ دننگ اٹ پاکستان نا کڑد ستاکڑزک۔ آذربائیجان نا الس و حکومت ناگورونوکارباخ نا ویل آ حکومت پاکستان نا مخ تفی نا منت وار ءُ۔
