حکومت ورناتے وارخواہی فراوان کننگ، اوفتا ویل آتے ایسر کننگ کن کوشست کننگ ءِ، وزیراعظم نا خصوصی کمکار امور نوجوانان عثمان ڈار نا ورکشاپ آن تران

اسلام آباد۔ 29ستمبر (اے پی پی) وزیراعظم نا خصوصی کمکار امور نوجوانان عثمان ڈار پارینے کہ حکومت ورناتے وارخواہی فراوان کننگ و اوفتا ویل آتےایسر کننگ کن کوشست کننگ ءِ، فیصلہ سازی ٹی ورناتے اوار کننگ کن نیشنل یوتھ کونسل اس جوڑ کننگانے، کاروبار اٹی آسانی ودی کرسا روزگار اٹی ودکی کننگ مریک، اینخو سال اسہ لکھ ورناتے روزگار فراوان کننگک۔ داخیال آتا درشانی ءِ او چارشنبے نادے آ نیشنل یوتھ کونسل نا باسک آتا کاریم نا کچءِ ودفنگ نا بابت اڈہلوک آورکشاپ آن تران کرساکرے۔ خصوصی کمکار پارے کہ ورناتے غاوئس کہ ننے فیصلہ سازی ٹی اوار کننگپک، دامسخت کن نیشنل یوتھ کونسل اس جوڑ کننگا تانکہ ورناتے فیصلہ سازی ٹی اوار کننگ مرے۔ اوپارے کہ اینخو سال انا ایسر اسکان اسہ لکھ ورناتے روزگار فراوان کینہ ہراکہ ننا مشن ءِ۔ اوپارے کہ ملک اٹ ورناک ہراجوزہ و خلوص اٹ کاریم کننگ ءُ اواسہ تاریخ اس نوشتہ کیرہ۔ اوپارے کہ کاروبار اٹ آسانی ودی کرسا روزگار اٹ ودکی کننگ مریک، سندھ و بلوچستان اٹی ورناتا گڑتیک ئسر، اوفتا گڑتی تا چٹفنگ کن اوفتا راجی آسراتی کن کاریم و اوفتے پبی وارخواہی فراوان کینہ۔ اوپارے کہ سرسہب ورناپروگرام نا رداٹ بجٹ اٹ اوفتے کن 100ارب روپئی تخاسن ہرافتیان داتم اسکان 20ارب روپئی اوفتے ٹی بشخنگانے، ہزار آتا کچ اٹ ورناتے روزگار ترسا اوفتے تینا نت تیا سلفنگانے۔ مچ آ ملک آن سرسہب ورناپروگرام نا رداٹ 16ہزار ورناک چنکو بھلو کاروبار کننگ ءُ۔ اوپارے کہ ہرسال 20لکھ ورناملازمت دوئی کننگ کن مارکیٹ اٹ بریرہ، اوفتے روزگار فراوان کننگ کن سازگار چاگڑد اس فراوان کننگ انگ ءِ۔ اوپارے کہ نن خوانہ کہ ورناک مون آ بریر و اوفتا انت کہ اڑاند اریر اوفتے مُر کینہ۔ خصوصی کمکار پارے کہ ورناتے کن جسمانی فٹنس و سپورٹس لازم وملزوم ءِ۔ اوپارے کہ یونیورسٹی تیٹی گوازی تا مقابلہ نا بناءِ کننگ اُن ہراٹی ورناٹیلنٹ ہنٹ پروگرام، سپورٹس ٹیلنٹ، سرسہب اولمپکس وایلو مقابلہ غاک اوار مریرہ، دامقابلہ غاتا مسخت بروک آ سیف گیمز و ایلو مقابلہ غاتے کن پوسکن آ ٹیلنٹ ءِ مون آ اتوئی ءِ۔ اوپارے کہ ہراورناتا آئی ٹی نا بشخ آن تعلق ءِ اوفتے ہم موقع ایتنہ۔ ہنداوڑ گرین یوتھ موومنٹ نا ہم بناءِ کننگ اُن۔ خصوصی کمکار پارے کہ وزیراعظم نا بلین ٹری سونامی ٹی ورناتے اوار کننگ خوانہ تانکہ اوفتے زیات آن زیات وارخواہی فراوان کننگ مرے۔ اوپارے کہ چندی بشخ آئی ٹی بزنس و سپورٹس اٹی ورناتے مون آ اتسا اوفتے وارخواہی ایتنہ۔