الیکٹرانک وونٹنگ مشین نا کاریم اٹ اتنگ آن گچین کاری تیٹی شفافیت بریک، بنجائی وزیر سائنس اینڈ ٹیکنالوجی سینیٹر شبلی فراز نا ’’ہندی حکومت آتا آخبت نا بارواٹ قومی کانفرنس‘‘ آن تران

اسلام آباد۔ 29 ستمبر (اے پی پی) بنجائی وزیر سائنس اینڈ ٹیکنالوجی سینیٹر شبلی فراز پارینے کہ الیکٹرانک وونٹنگ مشین (ای وی ایم) نا کاریم اٹ اتنگ آن گچین کاری تیٹی شفافیت بریک و دھاندلی نا گمان چٹک، بروک آ اِراسال اٹی سائنس و ٹیکنالوجی نا بشخ اٹی پین مخلوق ءِ روزگار نا موقع فراوان کینہ۔ چارشنبے نادے آ داڑے ’’ہندی حکومت آتا آخبت نا بارواٹ قومی کانفرنس‘‘ آن تران کرسا اوپارے کہ لوکل گورنمنٹ نا پنجر سوگو مرے تو بھرمک شیفکوکہول اسکان کارہ، یونین کونسل اٹ چندی ویل آتا ایسری کن کاریم کننگک، لوکل گورنمنٹ نا نمائندہ ہندی ویل آتیان معلومدار مریک۔ حکومت نا کوشست مسنے کہ گورننگ باڈی ءِ سپورٹ کے۔ بنجائی وزیر سائنس و ٹیکنالوجی پارے کہ ای وی ایم نا کاریم اٹ اتنگ آن گچین کاری تیٹی شفافیت بریک و دھاندلی نا گمان چٹک، گچین کاری تیٹی الیکٹرانک وونٹنگ مشین نا کاریم اٹ اتنگ غٹ آن اہم ءِ، ای وی ایم پورو وڑاٹ شفاف گچین کاری کرفک۔سینیٹر شبلی فراز پارے کہ ملک ءِ اصل ویل ہرامون تروک ءِ او الیکشن نا شفاف مننگ ءِ، باتننگ آن پد پاننگک کہ دھاندلی مسنے۔ اوپارے کہ ہراتم ای سائنس و ٹیکنالوجی نا وزیر مسٹ الیکٹرانک وونٹنگ مشین کنا اولیکو پروجیکٹ ئس، گڑاس بندغ ہندن ءُ ہرا داخواپسہ کہ گچین کاریک الیکٹرانک وونٹنگ مشین نا کمک اٹ مریر، گچین کاری تیٹی الیکٹرانک وونٹنگ آن پیشن نا ملک رہینگوک آ پاکستانی تے ہم آئی وونٹنگ نا کمک اٹ حق رائے دہی نا کاریم اٹ اتنگ نا موقع ملنگ کیک۔ اوپارے کہ ہندی حکومت آتا بھرم راج اٹ شیفکو کہول اسکان کاہک، لوکل گورنمنٹ نا نمائندہ ہندی ویل آتیان معلومدار مریک و او السی ویل آتا ایسری کن اہم و بنداوی کڑد اس اداکیک۔ سینیٹر شبلی فراز پارے کہ بروک آ اِراسال اٹی سائنس و ٹیکنالوجی نا بشخ اٹی پین مخلوق ءِ روزگار نا موقع فراوان کینہ۔ اوپارے کہ ننے دیر انا کمتی مون تروک ءِ۔ نن مچ آ ضلع کوہاٹ نا سروے ءِ کرین۔ ایہن تو دیر انا ویل ہرجاگہ ٹی ارے۔