اسلام آباد۔ 29 ستمبر (اے پی پی) خصوصی کمکار راجی رکھ و تخفیف نیزگاری سینیٹر ڈاکٹر ثانیہ نشتر راجی رکھ آ اڈ ہلوک آ اقوام متحدہ نا بڑزکو کہولی دیوان آن تران کرے۔ دیوان اٹی چندی جہانی راہشونک ساڑی ئسر۔ ڈاکٹر ثانیہ نشتر پاکستان نا نمائندگی ءِ کرے۔ دیوان نا کماشی ءِ اقوام متحدہ نا سیکرٹری جنرل ، جمیکا نا وزیراعظم و ڈائریکٹر جنرل انٹرنیشنل لیبرآرگنائزیشن کرے۔ دیوان اٹی بیلجیئم و مصر انا وزیراعظم آتون کاسٹاریکا، سلواڈور، آرجنٹینا ناصدر، نائیجیریا نا نائب صدر ئسک ہم تران کریر۔ ایلو راہشون تے ٹی بنگلہ دیش ، سلواڈور، روانڈ وایلو ملک آتا وزیر آک و یورپی کمشنر انٹرنیشنل پارٹنر شپس ہم ساڑی ئسر۔ ڈاکٹر ثانیہ نشتر کورونا نا رداٹ قومی و علاقائی اولیت روزگار و راجی رکھ آ گپ وتران کرے۔ پاکستان نا موقف ءِ پیش کرسا او پارے کہ جہانی کہول آ پدتموک ملک آتے کن منصفانہ مالی وسیلہ، گرین و ڈیجیٹل زرگزران نا مون آ دننگ کن نجی و سرکاری زرکاری، واپاری اصلاحات و راجی رکھ اکن سوگو گام گیج نا سخت گرج ءِ۔ حکومت پاکستان نا راجی رکھ پروگرام احساس نا بارواٹ اوپارے کہ احساس پروگرام ءِ جہانی کہول آ بطور گلوبل ماڈل اس امنا کننگانے۔ تینا تران نا ایسری ہیت آتے ٹی اواقوام عالم ءِ سلہ خلک کہ پاکستان، ترکی، نائیجیریا ، کاسٹاریکا، جہانی بینک اواری اٹ جہانی راجی رکھ فورم نا ٹہیفنگ نا بست وبند ءِ کننگ ءُ ہراٹی اقوام عالم اواری اٹ تینا آزموندہ غاتا بنداو آ راجی رکھ انا جہانی گام گیج آتے مون آ دننگ کیرہ۔
