اسلام آباد۔ 28 ستمبر (اے پی پی) وزیرداخلہ شیخ رشید احمد پارینے کہ پاکستان وکینیڈا نا نیام اٹ تعلقداری بھاز متکن ءِ، پاکستان اوغانستان اٹی امن و سیاسی سوگوی کن تینا کڑد ءِ ادا کرساکیک، اوغانستان اسہ وتواجہ ءُ ملک اسے ہرا تینا فیصلہ غاتے تینٹ ہلنگ کن واکدار ءِ۔ داخیال آتا درشانی ءِ او کینیڈانا ہائی کمشنر پاکستان وینڈی کرسٹین گلمور تون گپ وتران کرساکرے ہرا سے شنبے نادے آ داڑے اوڑتون اوڑدہی کرے۔ اوڑدہی ٹی پاک کینیڈا ہڑتوم آ کنڈآتا تعلقداری تون اوار، اوغانستان و ڈیہہ نا جم حالیت آتیا سرجم گپ وتران کننگا۔ اوڑدہی ٹی امنا کننگاکہ اوغانستان اٹی پائیدار امن ڈیہہ نا شونداری و اوغان شاری تا شونہالی کن المی ءِ، و اوغان شاری تا انسانی بنداوتیا امداد المی ءِ۔ غذائی کاختی ودی مننگ نا سوب آتے چٹفنگ نا گرج ءِ۔ داوخت آ شیخ رشید احمد پارے کہ پاکستان وکینیڈا نا نیام اٹ تعلقداری بھاز متکن ءِ۔ پین فعال کننگ نا گرج ءِ۔ پاکستان اوغانستان اٹی امن و سیاسی سوگوی کن تینا کڑد ءِ ادا کرساکیک۔ اوپارے کہ اوغانستان اسہ وتواجہ ءُ ملک اسے، تینا فیصلہ غاتے ہلنگ کن واکدار ءِ۔ اوغانستان نا حکومت ءِ مشورہ تننگ کینہ خاص ءُ فیصلہ سے آ بیوس کننگ کپنہ۔ طالبان حکومت ءِداوخت آ فنڈز و انسانی وسیلہ غاتا کمتی مون تروک ءِ۔ مالی و انسانی وسیلہ غاتا کمتی آن حکومت ءِ چلیفنگ طالبان تیکن اسہ بھلو چیلنج اسے۔ وزیرداخلہ پارے کہ جہانی برادری طالبان تے وخت و وسیلہ ایتے، اومیت ءِ طالبان تینا قول آتیا پورو عملدرآمد کیک۔ اوغانستان آ٘ن پیش تمنگ اٹ جہانی برادری نا کمک و مدت ءِ برجاتخنہ۔ کینیڈاٹی رہینگوک آ پاکستانیک ہڑتوم آ ملک آتا راجی وزرگزرانی شونداری ٹی کڑداداکننگ ءُ۔ داوخت آ کینیڈین ہائی کمشنر پارے کہ کینیڈین ہائی کمیشن نا درخواست آ اوغان شاری تا پیش تمنگ آ پاکستان نا منتوار اُن۔ اوغانستان آن درملکی و اوغان شاری تے کشنگ اٹ۔ پاکستان نا کڑد بھلو کارنامہ اسے۔ اوپارے کہ ساڑی حالیت آتے ٹی اوغان شاری تیکن انسانی بنداوتیا امداد کرینن۔ پاکستان نا کنڈآن سی لکھ اوغان مہاجرآتا خیالداری ستاکڑزک۔ وزیرداخلہ شیخ رشید کینیڈین ہائی کمشنر ءِ باوری کرفے کہ پاکستان کینیڈا نا درخواست آ پین بندغ آتے اوغانستان آن کشنگ اٹ کمک فراوان کیک۔
