کراچی۔27ستمبر (اے پی پی):وزیراعظم عمران خان ءَ گشتگ کہ بنجاہی حکومت ءَ کراچی سرکلر ریلوے ءِ منصوبہ ءِ ھاترءَ جزم کتگ، کراچی ٹرانسفارمیشن پلان ءِ سرءَ عمل کنگ وشیں گپ اِت، کراچی ءِجیڑ ہ ء ُ جنجالانی گیشء ُ گیوار کنگ ءِ ھاترءَ بنجاہی ء ُ صوبائی حکومتاں وتی سیاسی کستء ُ کینگ ہلاس کنگ ء ُ یکجاہ کار کنگ لوٹ ایت، بنڈل آئی لینڈ ءِ منصوبہ ءَ چہ درملکی زرکاری کیئت، اے منصوبہ سندھ ء ُ سرجمیں پاکستان ءِ ھاترءَ فائدگ مند اِنت۔ اے ھیالانی درشانی آئی ءَ دوشمبےءِ روچءَ کراچی ءَ نوکیں ترز ءِ سرکلر ریلوے ءِ منصوبہ ءِ بن اِشت ایر کنگ ءِ مراگش ءِ موہ ء تران کنان ءَ کتگ۔ اے موہ ءَ سندھ ءِ گورنر عمران اسماعیل ، سندھ ءِ سروزیر مراد علی شاہ ، حالءُ اھیوال کاری ء ُ شنگکاری ءِ بنجاہی وزیر چوہدری فواد حسین ، بنجاہی وزیر سید علی زیدی، بنجاہی وزیر اسد عمر، بنجاہی وزیر اعظم سواتی ہم ساڑی بوتگ۔ مزن وزیر ءَ گشتگ کہ کراچی پہ پاکستان ءِ ھاترءَ باز حاس اِنت۔ مزن وزیر عمران خان ءَ گشتگ کہ سی آر ءِ منصوبہ سرجمیں کراچی ءَ را ہم دپ کنت کہ ایشی ءَ چہ ٹریفک ءِ جیڑہ کم بیت۔ آئی ءَ گشتگ کہ گرین لائن بس سر وس ہم حاسیں منصوبہ اِت۔ آئی ءَ سندھ ءِ سروزیر ءَ را گشتگ کہ بنڈل آئی لینڈ ءِ منصوبہ ءِ یک رندے پدا چارء ُ تپاسی ءَ بہ کن ، اے منصوبہ ءَ چہ کراچی ءَ زرکاری کیئت۔ ریلوے ءِ بنجاہی وزیر اعظم سواتی ءَ مراگش ءَ گوں تران کتگء ُ گشتگ کہ کراچی ء ِ معاشی ء ُ اقتصادی ارزشت سک باز اِنت۔ انوگیں حکومت ءَ ریلوے ءِ جوانیں منصوبہ بندات کتگ اَنت۔ کراچی ءَ را نوکیں ٹرانسپورٹ ءِ آسراتی دیئگ ءِ شاباشی مزن وزیر عمران خان ءَ را دیئگ بیت۔ آئی ءَ گشتگ کہ 50 سال ءَ چہ ریلوے نقصان ءِ تہا بوتگ اَنت لھتیں ماہانی تہا یک جوانیں ءُ پائدگ دیئوکیں ادارگے جوڑ کنگ بیت۔ ایشی ءَ چہ پیسر مزن وزیر ءَ کراچی ءَ نوکیں ترز سرکلر ریلوے ءِ منصوبہ ءِ بُن اِشت ایر کتگ، اے منصوبہ 207 ارب کلدار ءِ ھرچ ءَ چہ سرجم کنگ بیت۔
