اسلام آباد۔ 27ستمبر (اے پی پی) وزیراعظم عمران خان پارینے کہ اوغانستان اٹی جنگ انا نتیجہ غاتیا پاکستان ءِ دوبہ دار گوندنگپ، داسہ نن دوبہ خلنگ نارویہ ءِ ہلسا اوغانستان نا آخبت نا کنڈآ ہُرن، سہی گام دادے کہ امن و سوگوی کن پوسکن آ اوغان حکومت تون کمک کننگے، طالبان حکومت و جہانی برادری نا نیام اٹ رابطہ غٹ اکن مثبت نتیجہ غاتے پک کیک۔ اوداخیال آتا درشانی ءِ دوشنبے نادے آ پنی آامریکہ اخبار واشنگٹن پوسٹ اٹی شینک مروک آ اسہ سرحال اسے ٹی کرے۔ وزیراعظم نوشتہ کرینے کہ امریکی کانگرس ءِ تروک آ حوال آتے ٹی امریکی نسخان تیکن پاکستان ءِ دوبہ دار گوندنگ نا بابت بیان تے بنسا حیرت مس وخت اس کہ دہشت گردی نا برخلاف جنگ اٹی امریکہ نا سیوتی مننگ نا حیثیت اٹ پاکستان نا قربانی تا ہچ ءُ ذکر اس کننگتنے۔ ای 2001آن واروار آ خبڑدار کرسا کرینٹ کہ اوغان جنگ ءِ کٹنگ مفک۔ اوپارے کہ مستین اٹ پاکستان نا حکومت آک کانودی حیثیت نا دوئی کننگ کن امریکہ ءِ اوغانستان نا باندات آ خوش کرسا کریر۔ اوپارے کہ نائن الیون آن پد مستین نا مجاہد آتے دہشت گرد گوندنگا۔ دہشت گردی نا برخلاف جنگ انا مخ تفی ءِ کننگ آ عسکریت پسند پڑک آک ریاست پاکستان نا برخلاف جنگ انا پڑو کریر۔ وزیراعظم پارے کہ نن تینا بقاکن جنگ کرین و گچین فوج و انٹیلی جنس نظام نا بناآ دہشت گردی ءِ شکست تسن۔ نائن الیون آن پد اسٹ آن پد ایلو بروک آ اوغان حکومت آک اوغان الس نا نظراٹ تینا ہند اس ودی کننگ کتوس، ہنداسوب ءِ کہ اسٹ اس ہم اوغانستان اٹی وڈی خور و بے سہب حکومت کن جنگ کننگ کن تیار متو۔ وزیراعظم پارے کہ انت مسہ لکھ اوغان سیکورٹی فورس آتا پورووڑاٹ سلہہ بٹنگ نا دوبہ ءِ پاکستان آ خلنگ مریک؟ داحقیقت ءِ امنا کننگ نا جاگہ غا اوغان و دیکی حکومت و بھارت نا تہہ آن جوڑ مروک آ جعلی خبرآتے ٹی پاکستان ءِ دوبہ دار گوندسا کننگانے۔ اوپارے کہ پاکستان بے بنداو دوبہ غاتیان پد ہم سیم آ بائیومیٹرک کنٹرول و سیم انا اسیجائی چاروکی نا سلہ خلک۔ وزیراعظم پارے کہ نن تینا مالیاتی وسیلہ غاتیان اوغانستان تون ملحق تینا سیم آ باڑخلکن۔ اوپارے کہ داسہ نن دوبہ خلنگ نارویہ ءِ ہلسا اوغانستان نا آخبت نا کنڈآ ہُرن۔ وزیراعظم پارے کہ داسہ سہی گام دادے کہ امن و سوگوی کن پوسکن آ اوغان حکومت تون کمک کننگے۔ طالبان حکومت و جہانی برادری نا نیام اٹ رابطہ غٹ اکن مثبت نتیجہ غاتے پک کیک۔ اوپارے کہ اگہ نن سہی گام ہرفین تو دہشت گردی آن پاک و شونہال اوغانستان نا مسخت آتے دوئی کینہ۔ ولے اگہ نن مستین نا ردینک آتے دُوارہ کرین تو ہڑدڑ، مہاجرآتا نوکاپ اتون اوار اوار دہشت گردی ٹی ودکی مریک و غٹ فریق آک زہمی مریرہ۔
