لندن۔ 27ستمبر (اے پی پی) وزیرخارجہ مخدوم شاہ محمود قریشی پارینے کہ کورونا دین اٹی، پیشن ناملک اٹی رہینگوک آ پاکستانی تیان 30ارب ڈالر نا ترسیلات زر وطن آ بس، اوغانستان نا منجمد میرات آتے ملنگے، اوغان الس ءِ اینو مالی و انسانی امداد نا گرج ءِ۔ اودوشنبے نادے آ ’’پاکستان ہاؤس لندن‘‘ اٹی برطانیہ ٹی پاکستانی کمیونٹی آن تران کریکہ۔ وزیرخارجہ پارے کہ ای برطانوی پارلیمنٹ نا باسک آتے پاوہ کہ او اوغانستان نا ویل ءِ پارلیمنٹ اٹ ضرور تالان کیر۔ اوغانستان اٹی ہرا نزوری نمے نظر بننگ ءِ او مسکوہی کرپٹ حکمران تا سوب آن ءِ۔ اوپارے کہ اوغانستان نا 34صوبہ غاتے ٹی طالبان تے ہچ ءُ مزاحمت اسے تون مون تروئی تمیتو۔ تاشقند اٹی اشرف غنی پاکستان آ بے سوب دوبہ خلک و پاکستان ءِ حالیت آتا خرابی نا زموار گوندا۔ نائن الیون آن پد نن آن خواست کننگا و نن دہشت گردی نا برخلاف جنگ اٹی سیوتی مسن، ننا 80ہزار مخلوق شہید مس و ننے 150 ارب ڈالر آن زیات نا نسخان ہرفوئی تما۔ اوپارے کہ نن اوغانستان نا حالیت آتا بابت راستکی تے دنیا نا مون آ تخان۔ وزیرخارجہ جہانی برادری ءِ پارے کہ او اوغانستانءِ تنیا ہلپ، اوغانستان اٹی اسہ انسانی تنکی اس ودی مننگ ءِ اگہ دادے دمدستی توننگتو تو مہاجر آتا یلغار تون مون تروئی تمک۔ وزیرخارجہ پارے کہ اواوغانستان اٹی زالبول آتے بیدس برخہ غان کابل نا سڑک آتیا خنانے و مسن تے اسکول آ ہنسا خنانے و کنا حوال آتا رداٹ اینو اوغناستان نا تہہ ٹی امن و ایمنی نا حالیت گچین ءِ، نن اوغان شاری تا کمک ءِ کننگ اُن۔ وزیر جہانی برادری ءِ پارے کہ او اوغان تا انسانی بنداو تیا کمک ءِ کے و اوغانستان نا منجمد میرات آتے ملنگے۔ اینو اوفتے مالی و انسانی امداد نا گرج ء،۔ اینو اگہ جہانی برادری دوتے کشا تو اونا نتیجہ ٹی بروک آ بھسکاری نا زموار دیر مریک؟وزیرخارجہ پارے کہ اوغانستان اٹی امن اسیجائی زمواری ءِ۔ کشمیر نا بابت وزیرخارجہ پارے کہ اینو اِراسال آن زیات نا وخت گدرینگانے مقبوضہ کشمیرنا کودک الس بدترین بھارتی گھیڑ اتون مون تننگ ءُ، سید علی گیلانی نا میت نا بے حرمتی ءِ کننگا۔ انسانی حق انا دروغ تڑ چیمپیئن اونا است خواہی نا رداٹ اودے جہہ جاگہ کننگ نا موکل اسکان تتوس۔ اوپارے کہ پبی شاہدی تون نن 131پنہ غاتیا تالان ڈوزیئر جاری کرین ہراٹی بھارتی کوزہ گیر فوج انا جنگی ڈوہ انا شاہدیک ءُ۔ پاکستانی برطانوی کمیونٹی پاکستان نا توار ءِ سوگوی تننگ اٹ تینا کڑد ءِ ادا کننگ کیرہ۔ اوپارے کہ نن خوانہ کہ برطانوی پاکستانی تے وونٹ انا حق تننگے۔ نن خوانہ کہ الیکشن اٹ بشخ ہلنگ کن دوہری شہریت نا پابندی ءِ چٹفنگے تانکہ زیات آزموندہ کار مخلوق پاکستان نا پارلیمان اٹ برے۔ وزیرخارجہ پارے کہ کورونا دین اٹی ، پیشن نا ملک اٹی رہینگوک آ پاکستانی تیان 30ارب ڈالر نا ترسیلات زر وطن آ بس۔ اوپارے کہ اینخو نا سال نن 40سال آن کم وئی پیشن نا ملک رہینگوک آ سرسہب پاکستانی تا است بڈی نا فیصلہ ءِ کرین۔
