لندن۔ 27ستمبر (اے پی پی) وزیرخارجہ مخدوم شاہ محمود قریشی پارینے کہ کشمیرنا ویل ءِ ایسرکننگ آن بیدس سویلی ایشیاٹی دیرپا امن نا تغ اسُل پورو مننگ کپک۔ داہیت ءِ او دوشنبے نادے آ لندن اٹی کشمیر آن تعلق تخوک آ پنی آ برطانوی پاکستانی راہشون آتون اوڑدہی ٹی پارے۔ وزیرخارجہ مقبوضہ جموں و کشمیراٹی برجا انسانی حق انا بھلا خلاف ورزی تے تالان کننگ و کشمیری تا روا حق، ’’ حق خودارادیت‘‘ نا دوئی کننگ کن گچین توار بڑز کننگ نا بابت برطانوی پاکستانی تا کڑد انا ستاءِ کرے و مقبوضہ جموں و کشمیر اٹی بھارتی کوزہ گیر فوج انا کنڈآن برجا انسانی حق وجہانی کانود نا بھلا خلاف ورزی تیان بشخ ہلوک آتے معلومدار کرے۔ وزیرخارجہ کشمیر نا ویل، ءِ اقوام متحدہ تون اوار جہانی کہول آ ہرفنگ نا بابت پاکستان نا پدریسہ و بدل مفروک کوشست آتیان معلومدار کرے۔ اوپارے کہ حکومت پاکستان ساڑی ہی ٹی پبی شاہدی تیا مبنی اسہ ڈوزیئر اس مرتب کرینے، داڈوزیئراٹی بھارتی کوزہ گیر فوج اناسنگین زیات جنگی ڈوہ تا سرجم آک اوار ءُ۔ شاہ محمود قریشی پارے کہ برطانوی پارلیمنٹ اٹی مقبوضہ جموں و کشمیر نا حالیت آتا بابت ’’شرہ‘‘ نا اڈتننگ ستاکڑزک، برطانوی پارلیمنٹ اٹی مروک آ دا شرہ اسہ وار ولدا مقبوضہ جموں و کشمیر اٹی بھارتی ظلم ءِ دنیا نا مون آ بے نقاب کرینے۔ مخدوم شاہ محمود قریشی پارے کہ برطانوی پاکستانی کمیونٹی، کودک کشمیری تیا کروک آ، بھارتی ظلم و انسانی حق انا خلاف ورزی تے مون آ اتنگ اٹ تینا پبی کڑد ءِ ادا کے۔ اوکشمیری سرکڑدہ غاتے باور کرفے کہ پاکستان کشمیری تا حق خودارادیت کن جہد، پورو سیاسی، اخلاقی و سفارتی مخ تفی ءِ برجاتخنگ کن سنبرینگوک ءِ۔ دنیا ءِ دامعلوم کرے کہ ہراتم اسکان کشمیرنا ویل ءِ اقوام متحدہ سلامتی کونسل نا قرارداد و کشمیری تا است خواہی نا رداٹ ساف وڑاٹ ایسر کننگپک، سویلی ایشیاٹی دیرپاامن نا تغ اسُل پورو مننگ کپک۔
