اسلام آباد۔ 27ستمبر (اے پی پی) بنجائی وزیرداخلہ شیخ رشید احمد پارینے کہ پاک فوج دہشت گردی نا چٹفنگ کن ہروخت تیار ءِ ، اگہ دہشت گرد تنظیم اس کاٹم ہرفے تو اودے لتاڑنہ ہلینہ، ای پاسپورٹ آ کاریم مننگ ءِ و پاکستان دابابت اولیکو ملک مریک۔ داخیال آتا درشانی ءِ او دوشنبے نادے آ وزارت داخلہ ٹی ہفتہ وار پریس حوال اٹی کرے۔ وزیرداخلہ پارے کہ نیوزی لینڈ سیریز ءِ لتاڑنگ نا افسانہ نا حقیقت نا خڑک آ سرمسونن۔ اوپارے کہ دستانہ والا دُوک پاکستان ءِ نسخان تننگ نا کوشست کننگ ءُ، اوفتے مچ آ دنیا نا مون آ اتینہ۔ اوپارے کہ ملک اٹی سائبرکرائم ودنگ ءِ، ایف آئی اے ءِ سائبر کرائم نا بابت اسہ لکھ درخواست دوئی مسنے ، سائبر کرائم نا توننگ کن 2ارب نا فنڈ جاری کننگ اُن۔ وزیرداکلہ پارے کہ نادرا 75لکھ مخلوق ءِ کورونا ویکسین سرٹیفکیٹ جاری کرے، ویکسی نیشن نا جعلی سرٹیفکیٹس نا باندات آ نادرانا ہچ ءُ قصور اس اف۔ اوپارے کہ بدبختی ءِ کہ گڑاس زموار نا کنڈآن ملک اناشناختی کارڈز، ویکسی نیشن و پاسپورٹ ءِ دنیا ٹی بدنام کننگ انگ ءِ۔ اوپارے کہ آن ارائیول ویزہ نا آسراتی ءِ 50ملک آتیان ودفسا 65کننگ والااُن۔ پاسپورٹ و شناختی کارڈ انا سیکورٹی کن15پین فیچرز اتنگ اُن۔ ای پاسپورٹ آ کاریم مننگ ءِ و پاکستان ڈیہہ ٹی ای پاسپورٹ جاری کروک آ اولیکوملک مریک۔ اوغانستان نا بابت اسہ سوج اسے نا ورندی ٹی وزیرداخلہ پارے کہ دا جوان ءُ ہیت اسے کہ پاکستان آن اوغانستان آ ہنوک آتا کچ ودنگ ءِ۔ اسہ پین سوج اسے نا ورندی ٹی شیخ رشید یخین ظاہر کرے کہ 2023نا گچین کاریک شفاف وبے کنڈہلوک مریرہ، اوپارے کہ گچین کاری تیکن حکومت و الیکشن کمیشن نا نیام اٹ مفاہمت نا فضامرے۔ الیکشن کمیشن و حکومت خڑک بننگ ءُ ہراجوان ءُ ہیت اسے۔ الیکٹرانک وونٹنگ مشین آن گچین کاریک شفاف مریرہ، اوپارے کہ (ن) لیگ بے چیٹی و جوڈوکراٹے اٹ برباد مریک، بروک آ گچین کاری تیٹی (ن) لیگ اکن اسہ پوسکن ءُ سیاسی ماحول اس مریک۔ شہباز شریف نا خاہوت اٹی میرات ناجنگ چلینگ انگ ءِ مسلم لیگ (ن) نا2نا جاگہ غا 3پڑک جوڑ مرسا خننگ اٹی اُٹ۔ اسہ سوج اسے نا ورندی ٹی اوپارے کہ آئی جی اسلام آباد آن ہڑدے ئی بنداو آ رپورٹ ہلنگ انگ ءِ، اسلام آباد اٹی 4خون پراپرٹی نا جھیڑہ غا مس۔ اسہ پین سوج اسے نا ورندی ٹی اوپارے کہ پاک فوج دہشت گردی نا چٹفنگ کن عظیم قربانی تسنے، اگہ دہشت گرد تنظیم اس کاٹم ہرفے تو اودے لتاڑنہ ہلینہ۔ اوپارے کہ اسلام آباد حساس ءُ علاقہ اسے و دنیا نا میڈیا داڑے ساڑی ءِ، داڑے بے چیٹی نا موکل تفنہ۔
