اسلام آباد۔ 27ستمبر (اے پی پی) اسپیکر قومی اسمبلی اسد قیصر پارینے کہ سیل وسوات نا جہانی دے ءِ اڈتننگ نا مسخت دابشخ انا راجی، دودوربیدگی وزرگزرانی اہمیت ءِ تالان کننگ ءِ، پاکستان نا گل زمین سیل و سواتی تیکن رکھ ءُ جاگہ اسے، سیل و سوات نا بشخ ءِ مون آ درسا ملک انا اقتصادی ویل آتے ایسر کننگ مریک۔ جہانی یوم سیل وسوات نا وخت آ تینا کلہو اٹی اوپارے کہ نن تینا شاندار مستین و آخبت نا محافظ نا حیثیت اٹ جہانی برادری تون اوار سیل وسوات نا جہانی دے ءِ اڈتننگ اُن، اللہ تعالیٰ پاکستان ءِ سیل و سوات نا اعتبار اٹ بے پناہ قدرتی حسن آن شُپ کرینے۔ پاکستان سیل و سواتی تے قدرتی ندارہ، متکن آ تہذیب، متنوع دودوربیدگ آن لطف اندوز مننگ نا موقع فراوان کیک۔ اوپارے کہ اللہ تعالیٰ پاکستان نا ہرچار آ صوبہ بشمول گلگت بلتستان و آزاد جموں و کشمیرپرکشش قدرتی ندارہ تسنے، سیل و سوات نا بشخ چنکا کاروبار و ملک انا اقتصادی شونداری ٹی ودکی نا پبی لائخی تخک، پاکسان اٹی چندی جغرافیہ، موسم، حیوانات و نباتات آتون راجی و دودوربیدگی تنوع آن لطف اندوز مننگ نا بھلو وارخواہی اس ساڑی ارے۔ اسپیکر پارے کہ پاکستان اٹی سیل وسوات نا بشخ پائیدار شونداری نا بابت بھاز اہمیت تخوک تکنگک۔ دابشخ ملکی زرمبادلہ کٹیا کننگ نا اسہ بھلو ذریعہ اسے ، ملک اٹی سیل و سوات نا مون آ دننگ و شونداری کن حکومت نا کوشست ستاکڑزک۔ دابشخ ءِ شون ترسا ملک آن نیزگاری و بےروزگاری ءِ چٹفنگ مریک۔ اوپارے کہ حکومت سیل و سوات نا بشخ انا شونداری و ہندی و جہانی زرکاری کن تینا کوشست آتے برجاتخک۔ اونا پاننگ ئس کہ ساڑی آ دورہ گلگت بلتستان اٹی سیل وسوات نا اعتبار اٹ دلکش و زیباانگا دامان تا ندارہ ءِ کننگ نا موقع ملا۔ اسپیکر پارے کہ گلگت بلتستان ءِ اللہ تعالیٰ بے پناہ قدرتی حسن آن شُپ کرینے۔ مچ آ دنیا نا سیل وسواتیک گلگت بلتستان نا دلکش و زیباانگا حسن آن چس ہلنگ کن علاقہ نا ضرور دورہ ءِ کیر۔
