کوئٹہ۔ 27ستمبر (اے پی پی) وزیراعلیٰ بلوچستان جام کمال خان جہانی یوم سیل و سوات نا وخت آ تینا کلہو اٹی پارینے کہ اللہ تعالیٰ بلوچستان ءِ دلکش سیل و سواتی ہند و قدرتی حسن تسنے۔ بلوچستان قدرتی مش، جنگل، و آبشار آتاسوب آن بھاز اہمیت تخک۔ جام کمال خان یوم سیل وسوات نا وخت آ مستی پارے کہ بلوچستان نا جغرافیائی و طبعی ساخت انا رداٹ دنیا نا زیبا انگا ڈیہہ تیٹی شمارمریک، صوبہ ٹی سیل و سوات نا بشخ اٹی شونداری و زرکاری نا بے پناہ گمان و گنجائشت ارے۔ اوپارے کہ بلوچستان اٹی ٹورزم انڈسٹری نا مون آ دننگ کن حکومت گام گیج کننگ ءِ، بلوچستان حکومت سیل وسواتی ہند آتا بحالی کن چندی ڈٹ آتیا کاریم کننگءِ ، صوبہ ٹی واقع مزارآک ننامیرات ءُ۔ مذہبی سیاحت نا مون آ دننگ نا بابت اوہندآتا بحالی و رکھ اکن گام گیج کننگ انگ ءِ۔ وزیراعلیٰ بلوچستان جام کمال خان پارے کہ سیل و سواتی تے اتنگ کن حکومت چندی ڈٹ آتیا کاریم کننگ ءِ۔ اوپارے کہ پیر غیب نا سیل و سواتی ہند آ سیل و سواتی تیکن آسراتی تسونن۔ ہنہ اوڑک کن اِرارویہ سڑک نا تفنگ آ کاریم برجاءِ وزیراعلیٰ بلوچستان جام کمال خان مستی پارے کہ سیل و سواتی ہند شابان ءِ ہم شونداری ڈٹ آتے ٹی اوار کرسا اونا ماسٹرپلاننگ کننگ اُن۔ یوادی شابان اٹی 50ملین نا خڑچ آن ایکوٹورزم ، مٹس ، ہربوئی، شینگھر وکوژک اٹی 100ملین نا خڑچ آن ٹورزم کیمپئن ویلیج آتا جوڑ کننگ نا ڈٹ اس ارے۔ اوپارے کہ بلوچستان نا سیل وسواتی ہند آتیا ریسٹ ہاؤس و ریسٹ ایریا نا تفنگ کن 300ملین جتا کننگانے۔
