اسلام آباد۔ 26ستمبر (اے پی پی) بنجائی وزیر حوالکاری و شینکاری چوہدری فواد حسین پارینے کہ مسکوہی دور اٹی کرپشن ءِ کانودی وڑاٹ رکھ فراوان کننگا، ہراتم لاہور۔ اسلام آباد موٹروے نا معاہدہ مسکہ، ہمووخت آ لندن اٹی ایون فیلڈ اپارٹمنٹس ہلنگاکہ، ملک اٹی اینو کبینی و نزور زرگزران نا بنداوی سوب وڈی خوری ءِ، ن لیگ سڑک آتا تفنگ کن اسہ ہزار کروڑ نا کبین معاہدہ کرے، وزیراعظم عمران خان مدام پارسا کرینے کہ ننے مافیاتا مون تروک ءِ، ہنداہمومافیاک ءُ ہرافتا برخلاف پاکستان تحریک انصاف نا جنگ ءِ۔ عمران خان سڑک آتا برخلاف اف، کرپشن نا برخلاف ءِ،ن لیگ سڑک آتا پن آ بھاز بھلو کرپشن اس کرے، 1947ء آن 2008ء اسکان پاکستان نا وامک 6ٹریلین ئسر ہرافتے آصف علی زرداری و نواز شریف 2008ء آن 2018ء اسکان 27ٹریلین اسکان سرکریر، ہراتم نن وام تے پدی تننگ کن وام ہلینہ تو داڑآن ملک انا وتواجہی زہمی مریک، مسکوہی دور اٹی پاکستان تون بھاز ظلم کننگا، پاکستان نا الس نا دترتے پلنگا، اینو ہرافک مگرمچھ نا خڑینک شولنگ ءُ، اوفتا سوب آن پاکستان نا الس ءِ مشکل مون تروک ءِ۔ داخیال آتا درشانی ءِ او یک شنبے نادے آ بنجائی وزیر مواصلات مراد سعید تون اوار پریس کانفرنس آن تران کرسا کرے۔ بنجائی وزیر حوالکاری پارے کہ 4دسمبر 2002ء آ ڈان اخبار اٹی اسہ خبر اس شینک مس ہراٹی پاننگاکہ اسلام آباد موٹروے نا خڑچ 60ارب روپئی آن گدرینگانے۔ اوپارے کہ موٹروے نا کل کٹیا 45کروڑ روپئی ءِ وخت اس کہ 60ارب روپئی نا دا موٹروے جوڑ مس۔ اوپارے کہ عمران خان سڑک آتا برخلاف اف اوکرپشن نا برخلاف ءِ ہراسڑک آتا پن آ کننگک۔ اوپارے کہ ن لیگ سڑک آتا پن آ بھاز کرپشن کرے، ہراتم لاہور۔ اسلام آباد موٹروے نا معاہدہ مسکہ، عین ہمووخت آ لندن اٹی ایون فیلڈ اپارٹمنٹس ہلنگاکہ۔ اوپارے کہ بدبختی اٹ لٹ و پل انا کمک اٹ دوئی کروک آ پیسہ غاتے ملک آہم خلتوس ، دافتے پیشن نا ملک آ گدریفنگا۔ بنجائی وزیر حوالکاری پارے کہ موٹروے آ ڈائیو کمپنی ءِ بیرہ اِرا ارب ڈالر نن سود انا مد اٹی تسن۔ اوپارے کہ موٹروے ضرور جوڑ مرے۔ سڑک آتیان بیدس شونداری نا تصور ہی اف ولے ن لیگ تینا دور اٹی سڑک آتا آڑاٹی کرپشن نا بناءِ کرے ہرانا سوب آن ملکی زرگزران نزور مس۔
