اسلام آباد۔ 26ستمبر (اے پی پی) صدر مملکت ڈاکٹر عارف علوی پارینے کہ سیل وسوات نا جہانی دے ءِ اڈتننگ نا مسخت جہانی برادری ٹی سیل وسوات نا اہمیت تون اوار اوار اونا راجی ، دودوربیدگی و زرگزرانی اہمیت ءِ تالان کننگ ءِ۔ اوپارے کہ ای داوخت آ جہانی برادری ءِ سلہ خلیوہ کہ او پاکستان نا دورہ ءِ کے و داپرامن و مہماندار ملک ءِ ہرے۔ جہانی یوم سیل وسوات نا وخت آ تینا خاص کلہو اٹی صدر مملکت پارے کہ پاکستان سیل وسواتی تے قدرتی ندارہ، پیڑی تیامتکن دودوربیدگ، کلچر، الس و مزیدار انگا کُن وخور آن فائدہ ہرفنگ نا موقع اس فراوان کیک۔ اوپارے کہ پاکستان نا ہرچارآ صوبہ بشمول گلگت بلتستان و آزاد جموں و کشمیر ءِ پرکشش قدرتی ندارہ تننگانے،م داڑے چندی محل و وقوع ، موسم، چندی علاقہ غاتا ساہدار، نباتات آتون اوار اوار راجی و دودوربیدگی تنوع آن چس ہلنگ نا بھلو وارخواہی اس دوئی ءِ۔ صدر مملکت پارے کہ سیل وسوات نا صنعت نا پائیدار شونداری نا بابت اِرارائے مننگ کپسہ انتئے کہ مچ آ دنیاٹی سیل وسوات نا بشخ زرمبادلہ کٹیاکننگ نا اسہ بھلو ذریعہ اسے۔ صدر مملکت پارے کہ 1990ٹی زرگزرانی تنکی، سونامی و زمی جمب پین پین آن پد دے ٹک بعید نا چندی ملک آک سیل و سوات آ انحصار کریر تانکہ تینا نت تیا اول سرآن سلنگ کیر۔ اوپارے کہ پاکستان اٹی سیل وسوات نا بشخ ملک اٹی چنکا کاروبار و سیل وسوات نا صنعت تون گنڈوک مخلوق نا زرگزرانی گچینی اتون اوار اوار ملک انا اقتصادی شونداری ٹی نمان کڑد ادا کننگ نا پبی لائخی تخک۔
