اسلام آباد۔ 26ستمبر (اے پی پی) بنجائی وزیر مواصلات و پوسٹل سروسز مراد سعید پارینے کہ پاکستان تحریک انصاف نا حکومت مسلم لیگ (ن) نا مقابلہ ٹی کم خڑچ اٹ موٹروے تفینے، مستین نا حکومت آک وام تا مد اٹ انبار ہلار، وزیراعظم عمران خان شاہراہ تا تفنگ آ شفافیت ءِ پک کرے۔ یک شنبے نادے آ داڑے پی آئی ڈی ٹی بنجائی وزیر حوالکاری و شینکاری چوہدری فوادحسین تون اوار پریس کانفرنس آن تران کرسا بنجائی وزیر مراد سعید پارے کہ مسلم لیگ (ن) نا دور اٹی موٹروے نا ڈٹ آتے ٹی کرپشن نا کسہ کیپٹل ازم انا پن اٹ شینک مروک آ کتاب اٹ ساڑی ءِ۔ اوپارے کہ تدوک آ 10سال ملک انا تاریخ اٹی تہار انگا دورئس۔ اوپارے کہ وزیراعظم عمران خان ہرجاگہ غا قوم انا پیسہ غاتے بچفینے۔ اوپارے کہ نم نواز شریف نا بارواٹ لازمی بنورے کہ ‘‘ اگہ کنیک تو خلیک ہم’’ ۔ مراد سعید پارے کہ وزارت نا ویب سائٹ آ پی ٹی آئی و پی ایم ایل (این) نا معاہدہ غاتا سرجم ساڑی ءِ۔ اوپارے کہ مسلم لیگ (ن) اسلام آباد آن لاہور 107کلومیٹر زیات موٹروے تفنگ آ قوم انا پیسہ غاتے زیان کرے۔ مراد سعید پارے کہ مسلم لیگ (ن) تینا دور حکومت اٹ وام ہلسا موٹروے تا تفنگ آ زیات خڑچ کرے۔
