اسلام آباد۔ 26ستمبر (اے پی پی) وزیرخارجہ شاہ محمود قریشی امریکہ نا بے کچ سرسہب دورہ ءِ پورو کرینے ہراڑے او اقوام متحدہ نا جنرل اسمبلی نا 76می دیوان اٹی بشخ ہلک۔ یک شنبے نادے آ جاری پریس ریلیز اٹی پاننگانے کہ وزیرخارجہ شاہ محمود قریشی نا دورہ امریکہ ءِ سفارتی وڑاٹ بھاز اہم گوندنگ انگ ءِ ہراٹی او اہم شخصیت آتون اوڑدہی کرے و اوغانستان نا حالیت آتون اوار چندی علاقائی و جہانی باندات آتیا پاکستان نا پبی نقطہ نظر ءِ پیش کرے۔ وزیرخارجہ مخدوم شاہ محمود قریشی 20ستمبر آ اقوام متحدہ جنرل اسمبلی نا 76می دیوان اٹی بشخ ہلنگ کن نیویارک آ سرمس۔ وزیرخارجہ اقوام متحدہ جنرل اسمبلی نا 76می دیوان نا بنائی دود اٹی بشخ ہلک۔ وزیرخارجہ کونسل آن فارن ریلیشنز اٹی بطور مہمان خاص بشخ ہلک و پاک امریکہ تعلقداری، اوغانستان نا حالیت آتون اوار چندی علاقائی و جہانی باندات آ پاکستان نا نقطہ نظر ءِ پیش کرے۔ وزیرخارجہ جہانی میڈیا نمائندہ غاتون گپ وتران کرے و چندی باندات آ پاکستان نا موقف ءِ پیش کرے ۔ وزیرخارجہ امریکی وزیرخارجہ انٹونی جے بلنکن تون اوڑدہی کرے۔ دااوڑدہی ٹی ہڑتوم آکنڈآتا تعلقداری، اوغانستان نا حالیت و تین پہ تینی است خواہی نا باندات آتیا سجفنگا۔ امریکی وزیرخارجہ پیش تمنگ نا عمل اٹ پاکستان نا کڑد انا ستاءِ کرے ۔ وزیرخارجہ ، یورپی یونین نا خارجہ تعلقداری و سلامتی نا سروک بوریل جوزف تون ملا و ہڑتوم آ کنڈآتا تعلقداری، سٹریٹجک شریداری تون اوار اہم باندات آ گپ وتران کرے۔ وزیرخارجہ اقوام متحدہ جنرل اسمبلی نا ہفتاد ءُ شش می دیوان نا وخت آ او آئی سی رابطہ پڑک کشمیر نا دیوان اٹی بشخ ہلک و تینا تران اٹی کشمیر اٹی برجا انسانی حق و جہانی کانود نا بھلا خلاف ورزی تیا پاکستان نا گڑتی آن معلومدار کرے۔
