اسلام آباد۔ 26ستمبر (اے پی پی) بنجائی وزیر حوالکاری و شینکاری چوہدری فواد حسین ہزارہ جرنلسٹس ایسوسی ایشن نا پوسکن گچین مروک آ عہدیدار آتے مبارکبادی ترسا پارینے کہ حکومت آجوئی درشانی نا بنداوی و جمہوری حق آ پورو یخین تخک، آجو، فعال و متحرک میڈیا جمہوریت نا سوگوی و جمہوری قدر انا مون آ دننگ کن المی ءِ۔ یک شنبے نادے آ تینا اسہ بیان اسے ٹی اوپارے کہ صحافی و میڈیا ورکرآتا حق انا رکھ اکن حکومت غٹ ممکن گام گیج کننگ ءِ۔ چوہدری فواد حسین پارے کہ اومیت ءِ پوسکن گچین مروک آ باسک آک صحافی برادری نا ویل آتا ایسری ٹی تینا پبی کڑد ءِ ادا کننگ تون اوار اوار جہانی برادری ٹی پاکستان نا گچین دروشمءِ تالان کیرہ۔ بنجائی وزیر حوالکاری ہزارہ جرنلسٹس ایسوسی ایشن نا پوسکن گچین مروک آ صدر تیمور جدون ، جنرل سیکرٹری لقمان شاہ، چیئرمین وقار عباسی، سرپرست اعلیٰ وقار فانی، فائناس سیکرٹری شاکر عباسی، نائب صدر عمرحیات، حاجی وحید، جوائنٹ سیکرٹری چنگیز جدون، نوازاحمد، سیکرٹری حوالکاری ارشد خان تنولی و گورننگ باڈی نا باسک آتے پوسکن آ زمواری سنبھالنگ آ مبارکبادی تس۔
