اسلام آباد۔ 25ستمبر (اے پی پی) بنجائی وزیر امور کشمیر و گلگت بلتستان علی امین خان گنڈاپور وزیراعظم عمران خان نا اقوام متحدہ نا جنرل اسمبلی آن تران آ وزیراعظم عمران خان ءِ زبردست خراج تحسین پیش کرسا پارے کہ کشمیر نا ویل ءِ پبی وڑاٹ تالان کرسا وزیراعظم کشمیری الس نا است ءِ کٹانے، وزیراعظم پک کرے کہ او اسہ حقیقی ءُ اسٹیٹس مین اسے۔ علی امین خان گنڈاپور ہفتہ نادے آ تینا اسہ بیان اسے ٹی پارے کہ عمران خان نئے بیرہ پاکستان، ڈیہہ بلکن جہانی دنیا ءِ مون تروک چیلنج آتا گچین احاطہ ءِ کرے۔ بنجائی وزیر پارے کہ وزیراعظم تینا تران اٹی اسلاموفوبیا و چاگڑدی بدلی کون آ ویل آتے ہم تالان کرے۔ علی امین گنڈاپور پارے کہ وزیراعظم بھارتی غیرکانودی کوزہ گیری ٹی کشمیر اٹی 5اگست 2019آن پد نا حالیت آتے سرجم اتون دنیا نا مون آتخا۔ اوپارے کہ وزیراعظم مقبوضہ کشمیر اٹی بھارتی سفاکیت ءِ مچ آ دنیا نا مون آ بے نقاب کرے۔ عمران خان آرایس ایس نا ہندوتوا نا نظریہ و بھارت اٹی مسلمان تیا ظلم ءِ ہم بے نقاب کرے۔ علی امین گنڈاپور پارے کہ وزیراعظم نا جنرل اسمبلی آن تران آن کشمیر ناویل آ جہانی مخ تفی ٹی پین ودکی مریک۔
