نیویارک/اسلام آباد۔ 25ستمبر (اے پی پی) وزیرخارجہ مخدوم شاہ محمود قریشی اقوام متحدہ جنرل اسمبلی نا 76می دیوان نا وخت آ بیلیجیئم نا نائب وزیراعظم و وزیرخارجہ سوفی ولیمز تون اوڑدہی کرینے۔ دفترخارجہ نا کنڈآن جاری بیان نا رداٹ اوڑدہی ٹی ہڑتوم آ کنڈآتا تعلقداری و اوغانستان نا مون آ بروک آ حالیت آتیا گپ وتران کننگا۔ تدوک آ تُو مروک آ ٹیلی فون گپ وتران نا بابت وزیرخارجہ پارے کہ پاکستان بیلیجیئم ءِ یورپی یونین اٹ پاکستان نا اہم واپاری شریداری تکک۔ اوپارے کہ پاکستان وزیراعظم عمران خان نا وژن ءِ مون آتخسا اقتصادی اولیت آتا ایجنڈا آ چکار کرینے۔ مخدوم شاہ محمود قریشی پاکستان و بیلیجیئم نا نیام اٹ ہڑتوم آ کنڈآتا واپاری و اقتصادی کمکاری ءِ پین سوگو کننگ نا گرج آ زور شاغا۔ وزیرخارجہ جی ایس پی پلس اسٹیٹس نا بابت پاکستان نا مخ تفی آ بیلیجیئم نا نائب وزیراعظم و وزیرخارجہ نا منت واری ءِ ہم ہرفے۔ ہڑتوم آ وزیرخارجہ غاتا نیام اٹ اوغانستان نا ساڑی آ حالیت آتیا ہم گپ وتران مس۔ مخدوم شاہ محمود قریشی پارے کہ اوغانستان اٹی امن پاکستان تون اوار مچ آ ڈیہہ کن خاص اہمیت تخک۔ اوغانستان اٹی انسانی و اقتصادی تنکی نا خطرہ ءِ مون آ تخسا جہانی برادری ءِ مرے کہ اوغان الس نا کمک کن پبی و گچین گام گیج کے۔ مخدوم شاہ محمود قریشی پارے کہ دامشکل وخت اٹی اوغان الس نا انسانی و زرگزرانی کمکاری جہانی برادری نا کنڈآن مثبت کلہورسیفنگ نا ذریعہ جوڑمریک۔ بیلیجیئم نا نائب وزیراعظم و وزیرخارجہ سوفی ولیمز کابل آن بیلجیئم نا سفارتی عملہ نا رکھ کشنگ اٹ پاکستان نا کنڈآن تروک آ خصوصی کمکاری آ وزیرخارجہ مخدوم شاہ محمود قریشی و پاکستانی سرکڑدہ غاتا منت واری ءِ ہم ہرفے۔
