راولپنڈی۔ 25ستمبر (اے پی پی) چیئرمین جوائنٹ چیفس آف اسٹاف کمیٹی (جے سی ایس ایس) جنرل ندیم رضاپیس مشن2021مشق آتا معائنہ ءِ کننگ کن روس انا دورہ ءِ کرے۔ سلہہ بند فوج انا شعبہ تعلقات عامہ (آئی ایس پی آر) نا کنڈآن ہفتہ نادے آ جاری بیان نا رداٹ دا مشق آک شنگھائی کمکار تنظیم (ایس سی او) نا بینرنا کیرغ آ اڈتننگ انگ ءُ۔ جنرل ندیم رضاشنگھائی کمکار تنظیم نا باسک ملک آتا چیفس آف جنرل اسٹاف نا میٹنگ اٹی ہم بشخ ہلک ہراٹی چندی علاقائی، جہانی و جیوپولیٹیکل امور خاص وڑاٹ اوغانستان نا حالیت آتا جاچ ءِ ہلنگا۔ دیوان اٹی دنیا نا چندی ڈیہہ تیٹی دہشت گرد تنظیم آتا کارروائی تیا ہم گپ وتران کننگا۔ جوائنٹ چیفس آف اسٹاف کمیٹی نا چیئرمین جنرل ندیم رضادیوان آن تران کرسا پارے کہ پاکستان ڈیہہ تون اوار جہانی کہول آ پرامن، شونداری و شونہالی نا اسیجائی مسخت آتا دوئی کننگ کن شنگھائی کمکار تنظیم تون اواری اٹ کاریمءِ برجاتخک۔ اوجہانی امن و سوگوی و دہشت گردی نا برخلاف جنگ اٹ پاکستان نا بے مٹ قربانی تے ہم مون آتخا۔ جنرل ندیم رضاپارے کہ اوغانستان اٹی امن و ایمنی ننا غٹ انا اسیجائی زمواری ءِ ہرا ڈیہہ نا امن کن گچین فائدہ ٹی ءِ۔ داوخت آ چیئرمین جوائنٹ چیفس آف اسٹاف کمیٹی رشین فیڈریشن نا چیف آف جنرل اسٹاف جنرل وائلرے وی گراسیموف و پیپلزلبریشن آرمی چین نا چیف آف جوائنٹ اسٹاف جنرل لی ژوچنگ تون ہم اوڑدہی کرے۔ اوڑدہی تیٹی جے سی ایس سی پارے کہ پاکستان روس و چین اتون تین پہ تینی دفاعی کمکاری ءِ بھاز اہمیت ایتک و داٹی پین ودکی نا خواہندار ءِ۔ اوپارے کہ پاکستان داہیت آ یخین تخک کہ دا ملک آک تین پہ تینی کمکاری نا مون آ دننگ آن مریس مدتی، تذویراتی تعلقداری تے بامعنی حداسکان ودفنگ کیرہ۔
